Suyodhana Review in Telugu: సుయోధన సినిమా రివ్యూ & రేటింగ్!

అయితే ఒకసారి వరుణ్ తండ్రి ప్రకాష్ కూడా అతనికి దుర్యోధనుడిలా కనిపిస్తాడు. దీంతో ‘తండ్రి నుండి తనకి ప్రాణ హాని ఉందేమో’ అనే అయోమయానికి గురవుతాడు వరుణ్. అయితే ఆ అనుమానం కలిగిన కాసేపటికే తండ్రి ప్రకాష్ హత్యకి గురవుతాడు? ఆ హత్య చేసింది వరుణ్ అని భావించి పోలీసులు అతన్ని అరెస్ట్ చేస్తారు. ప్రకాష్ ని చంపింది ఎవరు? వరుణ్ ఈ కేసు నుండి ఎలా బయటపడ్డాడు? అతనికి ప్రకాష్ స్నేహితుడు భూషణం(దేవి ప్రసాద్) ఎలా సాయపడ్డాడు? అసలు వరుణ్ కి ఉన్న డిసార్డర్ కి మహతికి(ప్రేమ) ఉన్న సంబంధం ఏంటి? అనేది మిగిలిన కథ.

నటీనటుల పనితీరు: ప్రియదర్శి ఇప్పటివరకు ఎక్కువగా కామెడీ పాత్రలు, సెటిల్డ్ రోల్స్ తోనే ప్రేక్షకులను అలరించాడు. ఈ ‘సుయోధన’ లో మాత్రం అతని పాత్ర భిన్నంగా ఉంటుంది. ఓ కొత్త ప్రియదర్శిని చూసిన ఫీలింగ్ కలుగుతుంది. అయితే ఇది ‘బలగం’ కి ముందు చేసిన సినిమా అనుకుంట. లుక్స్ లో ఆ తేడా స్పష్టంగా తెలుస్తుంది. ద్రిషిక చందర్ పాత్ర హీరోయిన్ కి తక్కువ సపోర్టింగ్ రోల్ కి ఎక్కువ అన్నట్టు ఉంటుంది. ఆమె నటన చెప్పుకోదగిన రేంజ్లో ఏమీ ఉండదు. సాయి కుమార్ ఎప్పటిలానే తన విలక్షణ నటనతో ఆకట్టుకున్నాడు. రాజశ్రీ నాయర్ తనకి అలవాటైపోయిన తల్లి పాత్రలో ఒదిగిపోయింది. ఈ సినిమాలో ఆమెకు కొంచెం స్క్రీన్ స్పేస్ దక్కింది అని చెప్పాలి. ప్రేమ పాత్ర మొన్నామధ్య వచ్చిన ‘కిష్కింధపురి’లో ఆమె చేసిన పాత్రకి దగ్గరగా ఉంటుంది. దేవి ప్రసాద్ ఓకే అనిపిస్తాడు. హీరో సత్యదేవ్ చిన్న అతిధి పాత్రలో కనిపించి సర్ప్రైజ్ ఇచ్చాడు.

సాంకేతికవర్గం పనితీరు: కొన్ని కథలు పేపర్ పై చాలా బాగుంటాయి. వాటిని సరిగ్గా తెరకెక్కించకపోతే పేపర్ పై ఎంత బాగున్నా ఉపయోగం ఉండదు. ‘సుయోధన’ కూడా అలాంటిదే. కథ వింటుంటే ఎలాంటి ప్రేక్షకుడికైనా ఆసక్తి కలుగుతుంది. ఈ విషయంలో దర్శకుడు వై.ఎస్.మాధవ్ రెడ్డిని అభినందించాల్సిందే. కథకుడిగా అతను సక్సెస్ అయ్యాడు. కానీ దర్శకుడిగా మాత్రం నిరాశపరిచాడు అనే చెప్పాలి. ఇంతకు ముందు చెప్పుకున్నట్టు ఇది ‘బలగం’ కి ముందు రూపొందిన సినిమా అయ్యుండొచ్చు.ఎలా చెప్పొచ్చంటే.. సినిమాలో ఒకటి రెండు చోట్ల 2000 రూపాయల నోట్లు వాడారు. వాస్తవానికి వాటిని 2023 జూన్ టైంలో రద్దు చేశారు.

అనేక కారణాల వల్ల ‘సుయోధన’ సినిమా షూటింగ్ ఆలస్యమైంది అని మేకర్స్ కూడా చెప్పడం జరిగింది. అందువల్ల కథనంలో కూడా ఏవైనా మార్పులు చోటు చేసుకుని ఉండొచ్చు. ఇలాంటి కథకి గ్రిప్పింగ్ స్క్రీన్ ప్లే అవసరం. అప్పుడే ప్రేక్షకులు అటెన్షన్ పే చేసి చూస్తారు. ఫస్ట్ హాఫ్ పర్వాలేదు. కానీ సెకండాఫ్ లో దర్శకుడు సస్పెన్స్ అనుకుని రాసిన సన్నివేశాలను ప్రేక్షకుడు ముందుగానే పసిగట్టేస్తాడు.కాబట్టి థ్రిల్ ఫీలవ్వలేడు. దేవి ప్రసాద్ క్యారెక్టర్ కి పెట్టిన ట్విస్ట్ ని కూడా ఆడియెన్స్ ఇట్టే కనిపెట్టేస్తారు అనడంలో సందేహం లేదు. దర్శకుడు ఈ విషయాల్లో జాగ్రత్త పడి ఉంటే కచ్చితంగా ఈ ‘సుయోధన’ స్థాయి వేరుగా ఉండేది. ప్రొడక్షన్ వాల్యూస్ కి పేరు పెట్టనవసరం లేదు. విజువల్స్ క్వాలిటీగానే ఉన్నాయి. మ్యూజిక్ పర్వాలేదు.

విశ్లేషణ: ‘సుయోధన’ లో ఓ థ్రిల్లర్ సినిమాకి సరిపడా కంటెంట్, సెటప్ ఉన్నాయి. కానీ ప్రెడిక్టబుల్ నెరేషన్, సెకండాఫ్ లో ల్యాగ్ ఉండటం వల్ల థ్రిల్ ఫ్యాక్టర్ మిస్ అవుతుంది. ఓటీటీ ఆడియన్స్ అయితే ఈ సినిమాకి పాస్ మార్కులు వేయొచ్చేమో.

ఫోకస్ పాయింట్: థ్రిల్ చేయలేదు ‘సుయోధన’

రేటింగ్: 2/5