చరణ్ కి దెబ్బలు తగలలేదు, షూటింగ్ ఆగిపోలేదు: టీం ఆర్.ఆర్.ఆర్

ఆర్.ఆర్.ఆర్ షూటింగ్ జరుగుతోందనే వార్తలకంటే ఆ సినిమా షూటింగ్ ఫలానా కారణంగా ఆగిపోయిందట అనే వార్తలే ఈమధ్యకాలంలో ఎక్కువవ్వడంతో.. పొరపాటున ఎలాంటి రూమర్ వచ్చినా జనాలు నమ్మేస్తున్నారు. తాజాగా అలాంటి రూమర్ ఒకటి హల్ చల్ చేయడం మొదలెట్టింది. అదేంటంటే.. సినిమా షూటింగ్ సమయంలో రామ్ చరణ్ కి మళ్ళీ గాయమైందని.. అందుకే ‘ఆర్.ఆర్.ఆర్” షూట్ ఆగిందని. నిజానికి ఈ వార్తలో ఎలాంటి నిజం లేదు. కానీ.. ఇదివరకు కూడా ఇదే తరహాలో ఎన్టీఆర్, చరణ్ లకు దెబ్బలు తగిలి షూటింగ్ కి బ్రేక్ ఇచ్చిన సందర్భాలున్నాయి కాబట్టి.. ఈ వార్త కూడా నిజమే అనుకున్నారు జనాలు.

దాంతో టీం మెంబర్స్ రంగంలోకి దిగి.. “చరణ్ సేఫ్ గానే ఉన్నాడు. ఎలాంటి గాయాలు తగలలేదు. నిన్న, ఈరోజు షూటింగ్ లో పాల్గొన్నాడ” అని క్లారిటీ ఇచ్చారు. చరణ్ సరసన బాలీవుడ్ భామ ఆలియా భట్, ఎన్టీఆర్ సరసన ఎమ్మా అనే హాలీవుడ్ భామ కథానాయికలుగా నటిస్తున్న ఈ చిత్రానికి రాజమౌళి దర్శకత్వం వహిస్తుండగా.. డి.వి.వి ఎంటర్ టైన్మెంట్ పతాకంపై దానయ్య నిర్మిస్తున్నారు. వచ్చే ఏడాది విడుదలవ్వనున్న మోస్ట్ క్రేజీయస్ట్ సినిమాల్లో ఇది ఒకటి.