విజయ్‌ (Vijay) సెమీ ఫైనల్‌ సినిమా విడుదలకు రంగం సిద్ధం చేస్తున్నారు. వెంకట్‌ ప్రభు (Venkat Prabhu) దర్శకత్వంలో విజయ్‌ నటిస్తున్న ‘ది గ్రేటెస్ట్‌ ఆఫ్‌ ఆల్‌టైమ్‌’ (The Greatest of All Time) రిలీజ్ డేట్‌ను టీమ్ ఫిక్స్‌ చేసింది. ఈ మేరకు ఓ పోస్టర్‌ను టీమ్ రిలీజ్ చేసింది. దాని ప్రకారం ఈ సినిమా విజయ్‌ కెరీర్‌లో గత 20 ఏళ్లలో ఎప్పుడూ లేనట్లు సెప్టెంబరులో విడుదల కాబోతోంది. అవును, ఈ సినిమాను సెప్టెంబరు 5న రిలీజ్ చేస్తున్నారు. దీంతో ఆ డేట్‌ను స్పెషల్‌గా విజయ్‌ ఎందుకు ఓకే చేశాడు అనే చర్చ మొదలైంది.
వచ్చే తమిళనాడు అసెంబ్లీ ఎన్నికల్లో విజయ్‌ పార్టీ బరిలో నిలుస్తుంది. ఈ నేపథ్యంలో ఆయన మరో రెండు సినిమాలు మాత్రమే చేస్తారు అని వార్తలొస్తున్నాయి. ఈ నేపథ్యంలో ‘ది గ్రేటెస్ట్‌ ఆఫ్‌ ఆల్‌టైమ్‌’ సినిమాను సెమీ ఫైనల్‌ అనొచ్చు. ఫైనల్‌ ఏంటి అనేది ఆఖరున చెబుతాం. ఇక ‘గోట్‌’ సంగతి చూస్తే… ఈ బహుభాషా చిత్రాన్ని ఏజీఎస్‌ ఎంటర్‌టైన్‌మెంట్స్‌ నిర్మిస్తోంది. మీనాక్షి చౌదరి కథానాయికగా నటిస్తున్న ఈ సినిమా చిత్రీకరణ చివరికొచ్చింది అని చెబుతున్నారు.
అందుకే సెప్టెంబరు 5న తెలుగు, తమిళ, హిందీ భాషల్లో ఈ సినిమాను రిలీజ్ చేస్తున్నట్లు టీమ్ ప్రకటించేసింది. ఆ పోస్టర్‌లో విజయ్‌ కళ్లద్దాలు పెట్టుకుని నెరిసిన జుట్టు, గడ్డంతో సీరియస్‌గా చూస్తూ కనిపించాడు. సైన్స్‌ ఫిక్షన్‌ యాక్షన్‌ థ్రిల్లర్‌గా రూపొందుతున్న ఈ చిత్రంలో విజయ్‌ తండ్రీకొడుకులుగా ద్విపాత్రాభినయం చేస్తున్నాడు. కొడుకు పాత్ర కోసం డీఏజినింగ్‌ టెక్నాలజీ వాడి యువకుడిగా చూపిస్తారట. ఇక మే చివరి నాటికి సినిమా చిత్రీకరణ పూర్తవుతుందని అంటున్నారు.
ఇందాక ఫైనల్‌ అని చెప్పాం కదా… ఆ సినిమానే హెచ్‌.వినోద్‌తో (H. Vinoth) చేయబోయే చిత్రం. ఇటీవల ఓకే అయిన ఈ సినిమా నిర్మాణ సంస్థను తేల్చుకునే క్రమంలో ఉందట. త్వరలో ఈ సినిమా అనౌన్స్‌మెంట్‌ అవుతుంది అంటున్నారు. ఆ సినిమా రిలీజ్ తర్వాత విజయ్‌ పాలిటిక్స్‌లోకి వచ్చేస్తాడు.
