తమన్ కావొచ్చు.. ఇంకొక సంగీత దర్శకుడు కావొచ్చు.. ప్రస్తుతం ఎవరు ట్యూన్ ఇచ్చిన పాట రిలీజైనప్పుడు ఆ పాట బాగుందా లేదా అనేది చూడకుండా నెటిజన్లు చేస్తున్న పని.. ఇలాంటి పాట ఇంతకుముందు వచ్చిందా? ఆన్లైన్ టూల్స్ వాడి మరీ ఈ పాట ట్యూన్ అందులోనిది, ఇందులోనిది అని వివరాలు చెప్పేస్తారు. దాంతో ఇంకేముంది కాపీ కొట్టేశారు అంటూ కామెంట్లు చేసేస్తారు. అసలు ఈ కాపీల గోలేంటి? ఎందుకిలా జరుగుతోంది అనే వివరాలను ఇటీవల ఓ మీడియాతో మాట్లాడుతూ వివరించారు తమన్.
ఇతరులు కంపోజ్ చేసిన పాటలకు తమన్ పాటలకు డిఫరెన్స్ తక్కువగా కనిపించినా.. వారి నేపథ్య సంగీతానికి, తమన్ ఆర్ఆర్కి చాలా డిఫరెన్స్ ఉంటుంది. బ్యాగ్రౌండ్ స్కోర్ విషయంలో తమన్ ఎప్పుడూ గొప్పే. అయితే ఒక్కోసారి ఒకట్రెండు బీజీఎంలు, పాటలోని బీట్స్ ఎక్కడో విన్నట్లుగా ఉంటాయి. దానికి కారణం ఆయన వేరే పాటలను అనుకరించడం, తన పాటలనే రిపీట్ చేయడం. ఈ విషయాన్ని ఆయన కూడా ఒప్పేసుకుంటూ ఉంటారు. అయితే ఈసారి మరో పాయింట్ చెప్పుకొచ్చారు.
‘రాజాసాబ్’ సినిమాలో ‘నాచే నాచే’ను రీమిక్స్ చేయడం, ఆ తర్వాత సినిమా టీమ్ ఒరిజినల్ సాంగ్ హోల్డర్కు బాగానే డబ్బులు ముట్టజెప్పడం లాంటివి జరిగాయి అని ఓ టాక్. ఈ టాపిక్ గురించి అడిగితే.. అసలు సంగీత దర్శకులు ఫారిన్ మ్యూజిక్ను ఎలా తీసుకుంటారో చెప్పేశారు. ఫారిన్ మ్యూజిక్ లైబ్రరీస్లో ‘స్లైస్’ అని ఉంటాయట. అందులో కొన్ని పెయిడ్ ఉంటే, మరికొన్ని ఫ్రీ. ఫ్రీ మ్యూజిక్ తీసుకున్నాక అవి పాపులర్ అయితే.. వాటిని పెయిడ్గా మార్చి డబ్బులు అడుగుతుంటారని చెప్పారు.
దీంతో ఇప్పుడు ఆయన మాటలు వైరల్గా మారాయి. నిజానికి ఈ సమస్య ఫొటోల విషయంలో జర్నలిస్ట్లు పడుతుంటారు. ఆన్లైన్లో ఉచిత ఫొటోలు అని తీసుకున్నాక కొన్నాళ్లకు ఆయా వెబ్సైట్లు పెయిడ్లోకి మార్చేస్తాయి. దాంతో డబ్బులు కట్టుకోవాల్సి ఉంటుంది. ఇప్పుడు సంగీత దర్శకులకు కూడా ఈ సమస్య వచ్చిందన్నమాట.
