ప్రత్యేక గీతాలు లేవంటున్న తమన్!

February 9, 2021 / 06:00 PM IST

Join Us

పవర్ స్టార్ పవన్ కళ్యాణ్ ప్రధాన పాత్రలో నటించిన చిత్రం ‘వకీల్ సాబ్’. వేణుశ్రీరామ్ డైరెక్ట్ చేసిన ఈ సినిమాను దిల్ రాజు, బోనీ కపూర్ సంయుక్తంగా నిర్మించారు. శృతిహాసన్ హీరోయిన్ గా నటిస్తుండగా.. నివేదా థామస్, అంజలి, అనన్య వంటి తారలు ముఖ్య పాత్రలు పోషిస్తున్నారు. ఇటీవల టీజర్ ను విడుదల చేసిన చిత్రబృందం రిలీజ్ డేట్ కూడా అనౌన్స్ చేసింది. ఏప్రిల్ 9న ఈ సినిమాను ప్రేక్షకుల ముందుకు తీసుకురానున్నారు.

ఇదిలా ఉండగా.. కొన్నిరోజులుగా ఈ సినిమాకి సంబంధించిన ఓ వార్త సోషల్ మీడియాలో చక్కర్లు కొడుతోంది. ఈ సినిమాలో స్పెషల్ సాంగ్ ఒకటి ఉండబోతుందని.. అందులో స్టార్ హీరోయిన్ కనిపించే ఛాన్స్ ఉందంటూ ఊహాగానాలు వినిపించాయి. తాజాగా ఈ విషయంపై చిత్ర సంగీత దర్శకుడు తమన్ స్పందించారు. స్పెషల్ సాంగ్ ఉండబోతుందంటూ వస్తోన్న వార్తల్లో నిజం లేదని అన్నారు. ‘వకీల్ సాబ్’ షూటింగ్ అంతా పూర్తయిపోయిందని.. ఇకపై సినిమాకి సంబంధించి ఎలాంటి షూటింగ్ జరగదని తేల్చి చెప్పారు.

దీన్ని బట్టి పవన్ సినిమాలో ఎలాంటి స్పెషల్ సాంగ్స్ లేవని తేలిపోయింది. ఈ సినిమాలో ఉన్నవి రెండు పాటలే. ఇప్పటికే ‘మగువా మగువా’ సాంగ్ రిలీజై శ్రోతలను ఆకట్టుకుంది. రెండో పాటను మార్చిలో విడుదల చేయనున్నారు. ప్రస్తుతం సినిమా పోస్ట్ ప్రొడక్షన్ వర్క్ జరుగుతోంది.