ప్రముఖ తమిళ హీరో కార్తి చాలా బిజీగా ఉన్నాడు. కారణంలో చేతిలో ఐదు సినిమాలు ఉండటమే. వాటిలో ఒక సినిమా పోస్ట్ ప్రొడక్షన్లో ఉండగా.. రెండు సినిమాలు సెట్స్ మీద ఉన్నాయి. మరో సినిమాలు ప్రీ ప్రొడక్షన్లో ఉన్నాయి. ఒక్కో సినిమా ఆసక్తికరమైన కాంబోలోనే సిద్ధమవుతోంది. ఈ క్రమంలో మరో ఆసక్తికరమైన కాంబో గురించి సమాచారం బయటకు వచ్చింది. అదే కార్తి నటిస్తున్న 31వ సినిమా. ఇటీవల ప్రకటించిన ఈ సినిమా హీరోయిన్ అప్డేట్ వచ్చింది.
మోహన్ రాజా దర్శకత్వం వహిస్తున్న ఈ సినిమాలో హీరోయిన్గా త్రిషను ఎంపిక చేశారు అని చెబుతున్నారు. ఈ మేరకు ఆమెతో సంప్రదింపులు చివరి దశకు వచ్చాయని సమాచారం. మొన్నీమధ్యే ‘కరుప్పు’ సినిమాతో సూర్యకు మంచి విజయం ఇచ్చిన త్రిష.. ఇప్పుడు కార్తికి కూడా విజయం ఇస్తుందేమో చూడాలి. ఎందుకంటే కార్తికి సరైన సోలో విజయం వచ్చి ఏడేళ్లు అవుతోంది. ఆ తర్వాత విజయాలు వచ్చినా అవి ఇంకో హీరోతో కలసి చేసిన సినిమాలే.
ఇక ఈ సినిమాకు సంగీతం భాద్యతలను హిప్హాప్ ఆదికి ఇచ్చారు. గతంలో మోహన్రాజా, ఆది కలసి ‘తని ఒరువన్’ సినిమా చేశారు. పూర్తిస్థాయి ఫ్యామిలీ ఎంటర్టైనర్గా రూపొందనున్న ఈ సినిమా చిత్రీకరణ ఈ ఏడాది ఆఖరులో ప్రారంభమవుతుంది అని చెబుతున్నారు. వరుసగా యాక్షన్ సినిమాలు చేస్తున్న కార్తికి ఈ సినిమా ప్రత్యేకంగానే నిలవనుంది అని చెప్పొచ్చు.
ప్రస్తుతం కార్తి చేతిలో ఉన్న సినిమాలు చూస్తే.. ‘సర్దార్ 2’, కల్యాణ్ శంకర్ – మీనాక్షి చౌదరి సినిమా, ‘మార్షల్’, మోహన్ రాజా సినిమా, ‘హిట్: ది ఫోర్త్ కేస్’ సినిమాలు ఉన్నాయి. ‘సర్దార్ 2’ సినిమాను సెప్టెంబరు 10న విడుదల చేసే ప్రయత్నాల్లో ఉన్నారు. ఆ సినిమా విజయం సాధిస్తే ఆ తర్వాత వచ్చే సినిమాలకు మంచి బూస్టింగ్ అవుతుందని చెప్పొచ్చు.
