దర్శకుడు త్రివిక్రమ్ శ్రీనివాస్ తాజా చిత్రం “అ..ఆ” గురువారం రిలీజ్ అయి వేసవిలో వచ్చిన మంచి సినిమాగా పేరు తెచ్చుకుంది. ఈ సినిమా కథ కృష్ణ, విజయనిర్మల నటించిన “మీనా” కథలాగే ఉందే అని చూసిన వారిలో చాలా మంది అనుకున్నారు. అదే నిజమని ఫిలిం నగర్ వర్గాల టాక్.
తెలుగు నవల రచయిత యద్దనపూడి సులోచన రాసిన “మీనా” నవల ఆధారంగా నటి విజయ నిర్మల1971లో అదే పేరుతో సినిమా తీసారు. ఆమె “మీనా” తోనే దర్శకురాలిగా మారారు. మూడు గంటల పాటు సాగే ఈ సినిమా మహిళలను విశేషంగా ఆకట్టుకుంది. 45 ఏళ్ల తర్వాత అదే కథకు నేటి పరిస్థితులను జోడించి త్రివిక్రమ్ “అ..ఆ” సినిమాగా మన ముందుకు తీసుకొచ్చారని సినీ పండితులు చెబుతున్నారు. ఈ సినిమాపై చర్చ మొదలు కావడంతో ఒక్కొక్క విషయం బయట పడుతోంది. ఈ కథ హక్కులను పదేళ్ల క్రితమే త్రివిక్రమ్ కొనుగోలు చేసినట్లు.. ముందుగా చెబితే ఈ సినిమాకు హైప్ రాదని భావించి బయటకు చెప్పలేదని టాక్ వినిపిస్తోంది. ఈ విషయం పై చిత్రానికి సంబందించిన వారు ఎవరూ స్పందించ లేదు. త్వరలోనే త్రివిక్రమ్ కథ విషయం పై క్లారిటీ ఇవ్వనున్నట్లు వార్త చక్కర్లు కొడుతోంది.
Home