మామూలుగా సినిమా పోస్టర్‌ల మీద ఎవరి ఫొటోలు వేస్తారు? స్టార్‌ హీరో సినిమా అయితే వీలైనంతవరకు హీరో ఫొటోలే ఉంటాయి. కొన్నిసార్లు హీరోయిన్‌, ఇతర ముఖ్య పాత్రల ఫొటోలు కూడా చిన్నగా ఉంటాయి. ఆ పాత్రల్లో ఐటెమ్‌ సాంగ్‌ భామ ఫొటో ఉంటుందా? ఈ ప్రశ్నలకు చాలా వరకు ‘లేదు’ అనే సమాధానం వస్తుంది. కానీ ఇటీవల ఓ సినిమా పోస్టర్‌ మీద ఐటెమ్‌ హీరోయిన్‌ ఫొటో కూడా వేశారు. అంటే చిన్న పాత్ర కూడా చేసింది అనుకోండి.
విషయం అది కాదు.. ఆ పోస్టర్‌ కారణంగా ఆమె ఓ ఓటీటీ సంస్థ సారీ కూడా చెప్పిందట. బాలకృష్ణ (Nandamuri Balakrishna) హీరోగా నటించిన చిత్రం ‘డాకు మహారాజ్‌’(Daaku Maharaaj) . ఈ సంక్రాంతికి వచ్చి మంచి విజయం అందుకున్న ఈ సినిమాలో బాలీవుడ్ నటి ఊర్వశీ రౌటేలా (Urvashi Rautela) ఓ చిన్న పాత్ర కోసం, ఐటెమ్‌ సాంగ్‌ చేసింది. ఈ క్రమంలో పోస్టర్‌లో ఆమె ఫొటో కూడా ఉంది. అయితే సినిమాను స్ట్రీమ్‌ చేసిన ఓటీటీ సంస్థ నెట్‌ఫ్లిక్స్‌ రిలీజ్ చేసిన ఫొటోలో మాత్రం ఆమె ఫొటో లేదు.
ఈ విషయంలో ఆమెకు నెట్‌ఫ్లిక్స్‌ సారీ చెప్పిందట. తమ టీమ్‌ నుండి తప్పు జరిగింది అని కూడా అందట. ఈ మాటను ఊర్వశినే చెప్పింది. ఈ క్రమంలో ఆమె మాటల మీద కొన్ని కామెంట్లు వస్తున్నాయి. ఒరిజినల్‌ రిలీజ్ పోస్టర్‌లో ఉన్న నా ఫొటోను తీసేసి నెట్‌ఫ్లిక్స్‌ పోస్టర్‌ షేర్‌ చేసింది. నెట్‌ఫ్లిక్స్‌ కావాలనే అలా చేసిందని కొందరు అనుకున్నారు. అందులో నిజం లేదు. నెట్‌ఫ్లిక్స్‌ కావాలని ఆ పని చేయలేదు. అంతేకాదు తప్పు గ్రహించి మాకు సారీ చెప్పింది.
ఆ తర్వాత నా ఫొటోలతో ఉన్న కొత్త పోస్టర్లను షేర్‌ చేసింది అని గుర్తు చేసింది. కాకపోతే మొదట షేర్‌ చేసిన పోస్టర్‌లో నా ఫొటో లేకపోవడంపై అభిమానులు ఆగ్రహం చెందారు అని ఊర్వశి అంది. అన్నట్లు ఆమె ఆ సినిమాలో ఏం చేసిందో చెప్పలేదు కదా ఆ సినిమాలో ఊర్వశి ‘దబిడి దిబిడి’ అనే పాటకు స్టెప్పులేసింది. ఇక్కడో డౌట్‌ ఏంటంటే.. మొన్నీమధ్య తన పేరున గుడి ఉందంటూ కొన్ని కామెంట్లు చేసి ఇబ్బందుల్లో పడ్డ ఊర్వశి.. ఇప్పుడు పోస్టర్‌ కామెంట్లను భుజానికెత్తుకుందా అనే కామెంట్లు వినిపిస్తున్నాయి.
