వాలెంటైన్స్‌ డే స్పెషల్‌: సినిమాల్లో బెస్ట్‌ లవ్‌ డైలాగ్స్‌ మీ కోసం..!

అబ్బాయి/ అమ్మాయిని మనసు గెలుచుకోవడం ఎంత కష్టమో, దాని కోసం ప్రేమను వ్యక్తం చేయడమూ అంతే కష్టం. మనసులోని భావాన్ని చెప్పడానికి ఆ సమయంలో మాటలు రావు. వచ్చినా అందంగా ఉంటాయని చెప్పలేం. దానికేముంది ఎలా చెప్పినా మనసులో ఇష్టముంటే ఓకే చేసేస్తారులే అనుకోవద్దు. ఎందుకంటే ప్రేమ ఎంత అందమైనదో, ఆ ప్రేమను కూడా అంతే అందంగా చెప్పాలి. అందుకే మన తెలుగు సినిమాల్లో రచయితలు చాలా అందమైన మాటలు రాసుకొచ్చారు ప్రేమ గురించి. అందులో కొన్ని మీకు పరిచయం చేస్తున్నాం.

* పది నెలలు మోసి కన్న మీ అమ్మకు నువ్వు సొంతమైతే.. ఇన్నాళ్లుగా మనసులో మోస్తున్న నాకు కూడా నువ్వు సొంతమే. (జాను)

* ప్రాణం అంటూ పోవాల్సి వస్తే అది నీతోనే. లేకపోతే నా ప్రేమకు అర్థమే లేదు (ఒక లైలా కోసం)

* ప్రేమ ఆరంభంలోనే అద్భుతంగా ఉందంటే.. ముగింపు ఇంకా అద్భుతంగా ఉండాలి. అలాంటి సముద్రమంత ప్రేమను చూడాలంటే.. జీవితపు చివరి అంచుల్లోనే చూడగలవు. అలా చూడాలంటే ఒక్కమ్మాయినే ప్రేమించాలి (ఆరెంజ్‌)

* నీ కోసమే నా అన్వేషణ.. నీ కోసమే నా నిరీక్షణ. నిన్ను చూసే క్షణం కోసం.. కొన్ని వేలసార్లు మరణించైనా సరే.. ఒక్కసారి జన్మించడానికి సిద్ధంగా ఉన్నాను (ఆర్య)

* గులాబీ పువ్వును ఇష్టపడితే కోస్తాం.. ప్రేమిస్తే నీళ్లు పోస్తాం (కంచె)

* నువ్వు ఇచ్చిన ధైర్యమే ఇంత బాగుంటే… లైఫ్‌ అంతా నువ్వు నాతో ఉంటే ఇంకెంత బాగుంటుంది? (నిన్ను కోరి)

* ఈ ప్రపంచంలో నేను ప్రేమించినంతగా నిన్ను ఎవ్వరూ ప్రేమించలేరు. నువ్వు ఎక్కడున్నా.. ఎలా ఉన్నా.. నన్ను మర్చిపోయినా.. ముసలిదానివైపోయినా.. చచ్చిపోయినా నీ మీద నా ప్రేమ చావదు (వాన)

* పెళ్లికి ముందులాగా.. పెళ్లి తర్వాత ప్రేమ కంటికి కనబడదు. అది ఒకరి మీద ఒకరికి ఉండే హక్కులోనే ఉంటుంది. ఒకరికోసం ఇంకొకరు తీసుకునే బాధ్యతలోనే ఉంటుంది (మజిలీ)

* కళ్లు కూడా మాట్లాడగలవని నాకు తెలియదు.. నీ కళ్లు నాతో మాట్లాడేదాకా! ప్రాణం లేకపోయినా బతకొచ్చని నాకు తెలియదు.. అది నువ్వు తీసుకెళ్లిపోయేదాకా! (మళ్ళీ మళ్ళీ ఇది రాని రోజు)

* నా ప్రేమను చాపలా పరిస్తే ఈ భూమి సరిపోదు. గాలిలో నింపితే ఈ విశ్వం బద్దలవుతుంది. నీళ్లలో కలిపితే సముద్రాలు ఇంకిపోతాయి. శివుడు విషాన్ని దాచినట్టుగా దాయగలను (అందాల రాక్షసి)

* నేను పడుకోబోయే ముందు చివరి ఆలోచన, లేచాక మొదటి ఆలోచన నువ్వే (ఓయ్‌)

* మనుషుల్ని సృష్టించిన ఆ దేవుడే ప్రేమను, మనసును సృష్టించాడు. మనిషి ప్రాణానికి పరిమితి పెట్టగలిగిన ఆ దేవుడు.. మనసుకు, ప్రేమకు ఎందుకు ఆ పరిమితులు పెట్టలేకపోయాడు (మనం)

* మనకు జ్వరమొచ్చినప్పుడు అమ్మ కావాలనిపిస్తుంది. భయమేసినప్పుడు నాన్న ఉంటే ధైర్యంగా ఉంటుంది. బాధలో ఉన్నప్పుడు పక్కన ఫ్రెండ్‌ ఉంటే బాగుంటుంది. ఆనందంగా ఉన్నప్పుడు మన పక్కన ప్రేమించిన వాళ్లుంటే బాగుంటుంది (తీన్‌మార్‌)