“ఛలో” థ్యాంక్స్‌ మీట్‌ లో డైరక్టర్ వెంకీ కుడుముల!

కొత్త కథ, కథనం ఉంటే తాము ఎప్పటికీ ఆదరిస్తామని తెలుగు సినీ ప్రేక్షకులు మరోసారి నిరూపించారు. పెద్ద స్టార్ సినిమా కాకపోయినప్పటికీ బాగుంటే చాలు హిట్ చేస్తామని చాటారు. నూతన దర్శకుడు వెంకీ కుడుముల దర్శకత్వంలో యువ హీరో నాగ శౌర్య నటించిన “ఛలో” మూవీ గత శుక్రవారం రిలీజ్ అయి యువతను విశేషంగా ఆకట్టుకుంది. విడుదలయిన అన్ని థియేటర్లలో హౌస్ ఫుల్ కలక్షన్స్ తో దూసుకుపోతోంది. ఈ సందర్భంగా చిత్ర బృందం థాంక్స్ మీట్ నిర్వహించింది. ఈ కార్యక్రమంలో డైరక్టర్  వెంకీ కుడుముల మాట్లాడుతూ.. “ఈ రోజు చిత్రసీమలో అవకాశం రావడం ఎంత కష్టమో… సహాయ దర్శకుడిగా పని చేసిన నాకు తెలుసు. దర్శకుడికి హీరో అవకాశం ఇవ్వడం వేరు. అతణ్ణి నమ్మి సొంత నిర్మాణ సంస్థ స్థాపించడం వేరు. నన్ను నమ్మి ఈ అవకాశం ఇవ్వడంతో పాటు నిర్మాణ సంస్థను స్థాపించిన నాగశౌర్యకు జీవితాంతం రుణపడి ఉంటా.

సినిమా ఇంత బాగా రావడానికి ఉషా ఆంటీ, శంకర్‌ అంకుల్‌ మద్దతే కారణం. వాళ్లకూ, చిత్రాన్ని ఆదరిస్తోన్న ప్రేక్షకులకు థ్యాంక్స్‌’’ అన్నారు. అనంతరం నాగశౌర్య మాట్లాడుతూ ” మంచి చిత్రం తీశాం. విజయం సాధిస్తుందనుకున్నాం కానీ… మరీ ఇంత పెద్ద విజయం సాధిస్తుందని అనుకోలేదు. ఈ విజయానికి కారణమైన ప్రేక్షకులకు, నా టీమ్‌కు థ్యాంక్స్‌. నా టీమ్‌ అని ఎందుకు అన్నానంటే… నేను ఒక్కడినే ఎప్పుడూ బలం కాలేను. సమిష్టి కృషికి దక్కిన ఫలితమిది. ప్రేక్షకులతో పాటు చిత్రాన్ని పోత్సహించిన చిరంజీవిగారికి చాలా చాలా థ్యాంక్స్‌’’ అన్నారు. ఐరా క్రియేషన్స్‌ పతాకంపై ఉషా ముల్పూరి నిర్మించిన ఈ చిత్రం ద్వారా కన్నడ బ్యూటీ  రష్మిక తెలుగు ప్రేక్షకుల మనసు దోచుకుంది.