పూరి కోసం ‘మజిలీ’ డైరెక్టర్ కు హ్యాండిస్తున్నాడా?

అతితక్కువ సమయంలోనే స్టార్ హీరోగా ఎదిగాడు విజయ్ దేవరకొండ. విజయ్ చేసే చిన్న సినిమాలు కూడా పెద్ద బ్లాక్ బస్టర్లుగా నిలుస్తున్నాయి. ప్రస్తుతం విజయ్ చేతినిండా సినిమాలతో బిజీగా గడుపుతున్నాడు. సో అతని డేట్స్ దొరకడం చాలా కష్టంగా ఉంది. 2020 వ సంవత్సరం పూర్తయ్యే వరకూ అతను ప్రాజెక్ట్స్ ను సెట్ చేసుకున్నాడు. ఈ క్రమంలో మిగిలిన దర్శకులు లేటైనా పర్లేదు అనుకుంటూ.. ఇప్పటి నుండే అతనితో సినిమాలు ఓకే చేయించుకుంటున్నారు. ఈ లిస్ట్ లో ‘నిన్నుకోరి’ ‘మజిలీ’ వంటి సూపర్ హిట్లు అందుకున్న శివ నిర్వాణ కూడా ఉన్నాడు.

‘మజిలీ’ బ్లాక్ బస్టర్ అందుకున్న సమయంలోనే శివ తో సినిమా చేస్తానని విజయ్ కూడా మాటిచ్చాడు. అయితే ఇప్పుడు ఆ మాట తప్పుతున్నాడని తెలుస్తుంది. ఇప్పుడు పూరి తనతో సినిమా చేయమని విజయ్ దగ్గరకు రావడం… ఈ క్రమంలో ‘ఇస్మార్ట్ శంకర్’ కూడా సూపర్ హిట్ కావడంతో పూరి తో సినిమా చేయడానికి మక్కువ చూపిస్తున్నాడట. అందుకే శివ నిర్వాణ ప్రాజెక్ట్ కూడా పక్కన పెట్టేసాడని తెలుస్తుంది. ఇక విజయ్ నటించిన ‘డియర్ కామ్రేడ్’ చిత్రం జూలై 26 న విడుదల కాబోతుంది.