అందాల నటి సిల్క్ స్మిత బయోపిక్ మూవీ డర్టీ పిక్చర్ సూపర్ హిట్ అయింది. ఆ తర్వాత క్రికెటర్ ధోనీపై తీసిన బయోపిక్ కూడా మంచి విజయం సాధించింది. రీసెంట్ గా రిలీజ్ అయిన అభినేత్రి సావిత్రి బయోపిక్ మూవీ మహానటి సంచలన సృష్టించింది. దీంతో దర్శక నిర్మాతలు బయోపిక్ ల మీద పడ్డారు. బాలీవుడ్ లెజెండరీ నటి మధుబాల, శ్రీదేవి జీవిత గాథలను తెరకెక్కించే ప్రయత్నాలు సాగుతున్నాయి. టాలీవుడ్ లో నందమూరి తారకరామారావు బయోపిక్ మూవీ ఎన్టీఆర్ ని బాలకృష్ణ నటిస్తూ నిర్మిస్తున్నారు. దీంతో సూపర్ స్టార్ కృష్ణ గురించి కూడా ప్రస్తావనకు వచ్చింది. ఒకవేళ సూప‌ర్‌స్టార్‌ కృష్ణ బయోపిక్ చేస్తే… అందులో హీరోగా ఎవరు నటిస్తే బాగుంటుంది? ఈ ప్రశ్న ఎవర్ని అడిగినా మరో సందేహం లేకుండా కృష్ణ తనయుడు మహేష్ బాబు పేరే చెబుతారు.
‘భరత్ అనే నేను’లో మహేశ్ ప్రమాణ స్వీకారం వాయిస్ టీజర్ విడుదల చేస్తే జనాలు కృష్ణ వాయిస్ అనుకున్నారు. తనయుడికి తండ్రి డబ్బింగ్ చెప్పాడని చాలామంది భావించారు. అలా రూపంలోనే కాదు వాయిస్ లోను కృష్ణ ని మహేష్ గుర్తుకు తెచ్చారు. తాజాగా కృష్ణ సతీమణి విజయనిర్మల ఈ విషయం పై మాట్లాడారు. “కృష్ణగారిన ఇమిటేట్ చేయడం కష్టం. ఆయన అందం, సాఫ్ట్‌నెస్‌ ఎవరికీ రాదు. ఒకవేళ ఆయన బయోపిక్ చేస్తే మహేష్ మాత్రమే చేయాలి” అని తెలిపారు. మొదటి నుంచి కృష్ణ నటించిన సినిమాలను రీమేక్ చేయడానికి మహేష్ బాబు ఒప్పుకోలేదు. క్లాసిక్ సినిమాలను టచ్ చేయకపోవడమే బెటర్ అంటుంటారు. కనీసం పాటలను కూడా వాడుకోలేదు. అటువంటిది తండ్రి బయోపిక్ చేస్తారా? .. ఏమో అభిమానులను సంతోషపెట్టడానికి చేస్తారేమో చూడాలి.
