చిరు పక్కన రాములమ్మ..!!

మెగాస్టార్ చిరంజీవి బ్లాక్ బస్టర్ చిత్రాల్లో గ్యాంగ్ లీడర్ ఒకటి. ఇందులో చిరు పక్కన గ్లామర్ క్వీన్ విజయశాంతి డాన్సులతో అదరగొట్టింది. వీరిద్దరి కాంబినేషన్లో వచ్చిన చిత్రాలు అప్పట్లో సూపర్ హిట్ గా నిలిచాయి. మళ్లీ ఈ జోడి తెరపైన కనిపించనున్నట్లు సమాచారం. చిరంజీవి 150 వ చిత్రంలో విజయశాంతి నటించనున్నట్లు ఫిల్మ్ నగర్ టాక్.

వి.వి.వినాయక్ దర్శకత్వంలో మొదటి షెడ్యూల్ పూర్తి చేసుకున్నకత్తిలాంటోడు సినిమా రెండో షెడ్యూల్ కి సిద్ధమవుతోంది. మెగా పవర్ స్టార్ రామ్ చరణ్ నిర్మిస్తున్న ఈ సినిమాలో కథానాయిక ఎవరు అనే విషయం పై ఇంతవరకు చిత్ర బృందం క్లారిటీ ఇవ్వలేదు. అయితే ఓ కీలక పాత్ర కోసం అలనాటి హీరోయిన్, లేడి అమితాబ్ బచ్చన్ విజయశాంతిని దర్శకుడు కలిసారని, ఆమె చిరు సరసన నటించేందుకు ఆసక్తిగా ఉన్నట్లు తెలిసింది. ఇందుకోసం బరువు తగ్గి మరింత అందంగా కనిపించేందుకు విజయ శాంతి కసరత్తు ప్రారంభించారట. చిరంజీవి తన రీ ఎంట్రీ గ్రాండ్ గా ఉండాలని భావిస్తున్నారు.

ఎక్కడా కాంప్రమైజ్ కావడం లేదు. కథ సెలక్షన్, ఆర్టిస్టుల ఎంపికలో ఆచి తూచి అడుగులు వేస్తున్నారు. సెంట్ మెంట్ ని ఫాలో అవుతున్నారు. తనకు హిట్ కాంబినేషన్ గా భావించిన వారిని ఈ చిత్రంలో భాగస్వాములను చేస్తున్నారు. ఆ ప్రయత్నంలో భాగంగానే విజయశాంతికి ఈ ఆఫర్ వెళ్లినట్లు చిత్ర బృందం తెలిపింది. ఈ విషయాన్ని త్వరలో అధికారికంగా వెల్లడించనున్నారు.