తెలుగు సినిమా పరిస్థితి ఇప్పుడు ఏమంత ఆశాజనకంగా లేదు. అందుకు సక్సెస్ రేట్ ఒక్కటే కారణం కాదు. నోటెడ్ హీరోల సినిమాలు ఎక్కువగా రాకపోవడం వల్లనే అని చెప్పాలి. మిడ్ రేంజ్ హీరోలు అయినటువంటి నాని, సాయి ధరమ్ తేజ్ వంటి వారు సైతం.. పాన్ ఇండియా మూసలో పడిపోయి.. ఏడాదికి ఒక సినిమా చేయడమే ఎక్కువ అనే స్థాయికి వచ్చేశారు. ఇలాంటి హీరోలు ఏడాదికి 3 సినిమాలు చేస్తేనే కదా థియేటర్లకి ఫీడింగ్ దొరికేది.
వీళ్ళు మాత్రమే కాదు చాలా మంది హీరోలు టైమ్ వేస్ట్ చేస్తున్న సందర్భాలు చూస్తూనే ఉన్నాం. ఉదాహరణకి కార్తికేయ గుమ్మకొండనే తీసుకుందాం..! ‘ఆర్ఎక్స్ 100’ వంటి బ్లాక్ బస్టర్ సినిమాతో మంచి క్రేజ్ సంపాదించుకున్న కార్తికేయ(Karthikeya).. ఆ తర్వాత హీరోగా చేస్తూనే, స్టైలిష్ విలన్ గా కూడా మెప్పించాడు. నాని ‘గ్యాంగ్ లీడర్’ అజిత్ ‘వలిమై’ లాంటి చిత్రాల్లో కార్తికేయ విలన్ గా చేసి ఆకట్టుకున్నాడు. తర్వాత ‘బెదురులంక 2012’ ‘భజే వాయు వేగం’ వంటి సినిమాలతో డీసెంట్ హిట్లు కొట్టాడు.
అయితే ఆ తర్వాత ఊహించని విధంగా మాయమైపోయాడు. అతని కొత్త ప్రాజెక్ట్ ఏమీ అనౌన్స్ కాలేదు. అసలు సినిమాలు చేస్తున్నాడా? లేదా? అనే విషయంపై కూడా మీడియాలో వార్తలు రావడం లేదు అంటే పరిస్థితి ఎంత ఘోరంగా ఉందో అర్ధం చేసుకోవచ్చు. కనీసం మీడియాలో లేదా సోషల్ మీడియాలో కూడా కార్తికేయ కనిపించింది లేదు. దీంతో ‘జనాలు ఇతన్ని మర్చిపోయారు’ అనే కామెంట్స్ ఇప్పుడు ఎక్కువగా వినిపిస్తున్నాయి.
కార్తికేయలా కాకపోయినా.. అల్మోస్ట్ ఇలాంటి సిట్యువేషన్లోనే ఉన్నాడు మెగా హీరో వైష్ణవ్ తేజ్(Panja Vaisshnav Tej). ‘ఉప్పెన’ సినిమాతో బాక్సాఫీస్ వద్ద వంద కోట్ల క్లబ్లో చేరిన వైష్ణవ్ తేజ్.. ఆ తర్వాత చేసిన ‘కొండపొలం’ ‘రంగ రంగ వైభవంగా’ ‘ఆదికేశవ’ వంటి సినిమాలు చేశాడు. అన్నీ డిజాస్టర్స్ అయ్యాయి. ‘ఆదికేశవ’ తర్వాత వైష్ణవ్ తేజ్ ఒక్క సినిమా కూడా చేయలేదు. కనీసం కొత్త ప్రాజెక్టుని అనౌన్స్ చేసింది కూడా లేదు. మీడియా ముందు కూడా వైష్ణవ్ కనిపించింది లేదు.
ఇటీవల వచ్చిన ‘ఇసకపట్నం’ ప్రమోషన్స్ లో భాగంగా టీంతో కలిసి ఓ వీడియోలో కనిపించాడు వైష్ణవ్. త్వరలో ఇతను కూడా మంచి ప్రాజెక్టుతో బౌన్స్ బ్యాక్ ఇస్తే బాగుంటుంది అనేది అందరి అభిప్రాయం.
