ఎంతోకాలంగా సరైన హిట్టులేక కిందా మీదా పడుతున్నాడు రామ్. తన తోటి హీరోలు నాని, విజయ్ దేవరకొండ, శర్వానంద్ వంటి వారు ఎప్పుడో 30 కోట్ల క్లబ్ లో చేరిపోయారు. కానీ రామ్ మాత్రం ఇప్పటివరకూ ఆ క్లబ్ లో చేరలేకపోయాడు. ఎట్టకేలకు ‘ఇస్మార్ట్ శంకర్’ తో ఆ ఫీట్ ను సాధించాడు. పూరి కూడా ‘టెంపర్’ తర్వాత.. సుమారు నాలుగేళ్ళు తరువాత హిట్టందుకున్నాడు పూరి. ఎట్టకేలకు ఇద్దరూ మంచి మాస్ హిట్టందుకున్నారు. ఇది పక్కన పెడితే… తాజాగా రామ్… మహేష్ ను కలవడం పెద్ద చర్చనీయాంశం అయ్యింది.
ఇటీవల పూరి ఓ ఇంటర్వ్యూలో మహేష్ పై చేసిన వ్యాఖ్యల కారణంగా పూరీని.. ఓ రేంజ్లో వాడేసుకుంటున్నారు ఫ్యాన్స్. ఈ విషయాన్ని పూరి కూడా ఒప్పుకున్నాడు ‘నన్ను ట్రోల్ చేస్తున్నారని’..! అయితే ఈ మధ్యే విదేశాలనుండీ వచ్చి సక్సెస్ సెలబ్రేషన్స్ లో జాయిన్ అయ్యాను రామ్.. ప్రమోషన్లు కూడా బాగానే చేస్తున్నాడు. ఈ నేపథ్యంలో మహేష్ తో కలిసి రామ్ దిగిన ఓ ఫోటో సోషల్ మీడియాలో తెగ వైరలవుతుంది. ఈ ఫోటోకి ‘ఇస్మార్ట్ శంకర్ తో ఎన్కౌంటర్ శంకర్’ అనే ట్యాగ్ లైన్ కూడా పెట్టారు. అంతేకాదు ఈ ఫోటో పై రకరకాల కామెంట్స్ పుట్టుకొస్తున్నాయి. అయితే పూరి పై వస్తున్న ట్రోల్స్ విషయం పై ‘రామ్ … మహేష్ ను కలిసి ఆయన ఫ్యాన్స్ ని కూల్ చేయమని చెప్పుంటాడు’ అని ఫిలింనగర్లో కొందరు కామెంట్స్ చేస్తున్నారు. మరి ఈ వార్తల్లో ఎంతవరకూ నిజముందో తెలియాల్సి ఉంది.
