Maruthi: ‘బేబీ’ స్థాయిలో విజయం కోసం వస్తున్న ‘బ్యూటీ!

గతేడాది చిన్న సినిమాగా వచ్చి భారీ విజయం అందుకున్న చిత్రాల్లో ‘బేబీ’ (Baby) ఒకటి. నిజానికి అలాంటి సినిమా లిస్ట్‌లో టాప్‌ ప్లేస్‌లో ఉన్న చిత్రమిది. ఆనంద్‌ దేవరకొండ (Anand Deverakonda) – వైష్ణవి చైతన్య (Vaishnavi Chaitanya)- విరాజ్‌ అశ్విన్‌ (Viraj Ashwin) ప్రధాన పాత్రల్లో రూపొందిన ఈ సినిమాను సాయి రాజేశ్‌ (Sai Rajesh Neelam) తెరకెక్కించారు. అయితే ఈ సినిమాను నిర్మించిన ఎస్‌కేఎన్‌ (Sreenivasa Kumar Naidu(SKN) ఈ సినిమా కోసం చాలా కష్టపడ్డారు. ప్రచారంలో కొత్త పుంతలు తొక్కించి వావ్‌ అనిపించారు. ఎస్‌కేఎన్‌ అంటే ఒకరు కాదు.. అదంతా మారుతి (Maruthi Dasari) టీమ్‌ అని అంటుంటారు. ఇప్పుడు ఈ చర్చ ఎందుకు అంటే.. మళ్లీ ఈ టీమ్‌ నుండి అలాంటి సినిమా ఒకటి వస్తోంది.

డిఫరెంట్ లవ్ స్టోరీతో ప్రేక్షకులను మెప్పించడానికి నిర్మాత అవతారం ఎత్తే మారుతి.. ఇప్పుడు మరోసారి సిద్ధమయ్యారు. ‘బ్యూటీ’ అనే టైటిల్‌తో ఓ సినిమాను అనౌన్స్‌ చేశారు. ఆర్వీ సుబ్ర‌హ్మ‌ణ్యం ద‌ర్శ‌క‌త్వం వ‌హిస్తున్న ఈ చిత్రాన్ని జీ స్టూడియోస్‌తో క‌లసి మారుతి టీమ్ నిర్మిస్తోంది. విజ‌య్ పాల్ రెడ్డి నిర్మాత‌. ‘బ్యూటీ’ సినిమా టైటిల్ పోస్టర్‌ను చిత్రబృందం విడుదల చేసింది. సినిమాను పూజా కార్యక్రమాలతో ప్రారంభించారు కూడా. హీరో, హీరోయిన్ మబ్బుల్లో కూర్చున్నట్టుగా.. ఎదురుగా లవ్‌ సింబల్‌ ఆకారంలో ఓ మేఘం ఉన్నట్లుగా చూపించారు.

‘బేబీ’ సినిమాలో నటించిన ఆనంద్ దేవరకొండ, విరాజ్‌ అశ్విన్‌, వైష్ణవి చైతన్య అంతకు ముందే కొన్ని సినిమాల్లో నటించినా ‘బేబీ’ వాళ్ల కెరీర్‌లో చాలా మార్పునే తీసుకొచ్చింది. ఇప్పుడు ‘బ్యూటీ’ సినిమాలో కూడా అలాంటి నటులే కనిపిస్తారు అని చెబుతున్నారు. ‘బ్యూటీ’లో కూడా ప్రేక్షకులను ఆకట్టుకునే పాయింట్ ఉంటుందని, యూత్‌కు బాగా నచ్చుతుందని చెబుతున్నారు. ‘బేబీ’ సినిమా సంగీత దర్శకుడు విజ‌య్ బుల్గానిన్ (Vijay Bulganin) ఈ సినిమాకీ సంగీతాన్ని అందిస్తున్నారు.

దీంతో ఈ సినిమా మీద భారీ అంచనాలు ఏర్పడుతున్నాయి. మారుతికి ఎంతో నమ్మకం కలిగితే కానీ ఇలాంటి సినిమాల కోసం ముందుకు రారని, ఆ లెక్కన ఈ సినిమాకు మంచి విజయం పక్కా అని చెబుతున్నారు. అన్నట్లు ఆయన దర్శకత్వంలో ప్రభాస్‌ (Prabhas) హీరోగా ‘రాజా సాబ్‌’ (The Rajasaab) శరవేగంగా తెరకెక్కుతోంది.