మల్టీస్టారర్ అని ఇప్పుడు ఓ పెద్ద పదం పెట్టి.. ఆ సినిమాలను హైలైట్ చేసి, హైప్ తీసుకొస్తున్నారు కానీ.. ఒకప్పుడు ఇలాంటి సినిమాలు నార్మల్గానే వస్తూనే ఉండేవి. రజనీకాంత్, కమల్ హాసన్ కలసి 21 సినిమాలు చేశారు. మోహన్లాల్, మమ్ముట్టి కలసి 50 సినిమాలకుపైగా నటించారు. అయితే ఇప్పుడు తరం హీరోలు కానీ, అప్పటి తరం హీరోలు కానీ ఇప్పుడు కలసి నటించడం తగ్గిపోయింది. దీంతో ఇద్దరూ కలసి నటిస్తే బాగుండు అని అన్ని పరిశ్రమల్లోనూ ఓ చర్చ నడుస్తోంది. ముఖ్యంగా టాప్ హీరోలు కలసి నటిస్తే బాగుండు అంటున్నారు.
తమిళనాట ఈ చర్చకు ఇటీవల ఫుల్ స్టాప్ పడిపోయింది. సుమారు 47 ఏళ్ల తర్వాత కమల్ హాసన్ – రజనీకాంత్ కలసి ఓ సినిమాలో నటిస్తున్న విషయం తెలిసిందే. ఈ మేరకు అధికారిక ప్రకటన కూడా వచ్చేసింది. సినిమాను వచ్చే ఏడాది ప్రారంభిస్తారు అని సమాచారం కోడంబాక్కం వర్గాల నుండి అందుతోంది. దీంతో టాలీవుడ్వైపు డిస్కషన్ టర్న్ తీసుకుంది. మన దగ్గర అలా ఇద్దరు అగ్రహీరోలు ఎప్పుడు కలసి సినిమా చేస్తారు అని.
తెలుగు పరిశ్రమలో టాప్ హీరోలు అంటే ఇప్పుడు వినిపించే పేర్లు చిరంజీవి – బాలకృష్ణ. వీరి తర్వాతనే ఇతర హీరోల పేర్లు వస్తాయి. అలాంటి ఈ ఇద్దరూ ఎప్పుడు కలసి సినిమా చేస్తారు అనే చర్చ మొదలైంది. నిజానికి ఈ మాట ఇటు చిరంజీవి, అటు బాలకృష్ణ చాలా ఏళ్లుగా అంటూనే ఉన్నాయి. మధ్య మధ్యలో ఒకరి మీద ఒకరు కౌంటర్లు వేసుకొని పరిస్థితిని వేడెక్కించి కలసి నటించడం కష్టమే అనే ఫీలింగ్ కూడా కలిగిస్తున్నారు అనుకోండి. ఆ విషయం వదిలేస్తే మన ఇద్దరు టాప్ స్టార్లను కలిపేది ఎవరు?
మొన్నామధ్య ఓ ఈవెంట్లో చిరంజీవి మాట్లాడుతూ దర్శకులు హరీశ్ శంకర్, బోయపాటి శ్రీను లాంటి వాళ్ల పేర్లు ఓపెన్గానే చెప్పి మంచి కథ రాయండి అని అడిగేశారు. ఇంద్రసేనా రెడ్డి విత్ సమర సింహారెడ్డి అని కూడా లైన్ ఇచ్చేశారు. మరి కథ రాసేదెవరు? సినిమా తీసేదెవరు. అన్నట్లు అతిథి పాత్రల సినిమా కాదు తెలుగు ప్రేక్షకులకు కావాల్సింది.. పూర్తి పాత్రల సినిమా.
