Youth Review in Telugu: యూత్ సినిమా రివ్యూ & రేటింగ్!

ప్రవీణ్ కి సోనాల్ ప్రపోజ్ చేసినప్పటికీ.. ప్రషీక కారణంగా అతను యెస్ చెప్పలేకపోతాడు. ఒకరోజు సోనాల్ కి నిజం చెప్పబోయి ప్రషీక కంటబడతాడు ప్రవీణ్. దీంతో ఆమె ఇతనికి బ్రేకప్ చెప్పేస్తుంది. అటు తర్వాత తన క్లాస్మేట్ గీతతో(అనిష్మ అనిల్ కుమార్) అనుకోకుండా ప్రేమలో పడతాడు ప్రవీణ్. కానీ ఆమెకు ప్రవీణ్ పై అటువంటి ఫీలింగ్స్ ఉండవు. అయితే ఆమె కారణంగా ప్రవీణ్ కాలేజీలో కొంతమంది స్టూడెంట్స్ తో గొడవపడతాడు. ఈ గొడవ వల్ల అతనికి ప్రిన్సిపాల్ టీసీ ఇచ్చేసే రేంజ్ కి వెళ్తుంది విషయం. ఆ తర్వాత ప్రవీణ్ జీవితం ఏమైంది? ప్రవీణ్ కారణంగా అతని తల్లిదండ్రులకు ఎదురైన సమస్యలు ఏంటి? అనేది మిగిలిన కథ.

నటీనటుల పనితీరు: ఈ విభాగంలో ముందుగా హీరో తండ్రి పాత్ర చేసిన సూరజ్ వెంజరముడు గురించి చెప్పుకోవాలి.తన పాత్రలో ఒదిగిపోయాడు. భార్యని పుట్టింటికి తీసుకెళ్ళే సన్నివేశంలో అలాగే భార్య చావుబ్రతుకుల మధ్య ఉన్నప్పుడు బాధతో కొడుకుపై చెయ్యి చేసుకునే సన్నివేశంలో కానీ జీవించేశాడు అని చెప్పాలి. అంత నేచురల్ గా చూపించి క్లైమాక్స్ లో కొడుకు ప్రయోజకుడు అయినప్పుడు వెంటనే కరిగిపోవడం అనేది కొంచెం రియాలిటీకి దూరంగా అనిపిస్తుంది. ఇక హీరోగా చేసిన కెన్ తన సహజ నటనతో మంచి మార్కులు వేయించుకున్నాడు. తల్లి పాత్రలో దేవదర్శిని కూడా బాగా చేసింది. చెప్పుకోడానికి ముగ్గురు హీరోయిన్లు ఉన్నా ఒక్కరి నటన కూడా ఇంపాక్ట్ ఫుల్ గా అనిపించదు. మిగిలిన నటీనటులు తమ పాత్రల పరిధి మేరకు బాగానే చేశారు.

సాంకేతికవర్గం పనితీరు: యూత్ఫుల్ లవ్ స్టోరీస్ కి ఎప్పుడూ మంచి డిమాండ్ ఉంటుంది. కాకపోతే మారుతున్న ప్రేక్షకుల అభిరుచికి తగినట్టు స్క్రీన్ ప్లే డిజైన్ చేసుకోవాలి. ఈ విషయంలో హీరో ప్రదీప్ రంగనాథన్ ఓ బెంచ్ మార్క్ సెట్ చేశాడు. న్యూ ఏజ్ లవ్ స్టోరీస్ కి, యూత్ఫుల్ ఎంటర్టైనర్స్ కు అతను సినానిమ్ అయిపోయాడు. హీరో కమ్ దర్శకుడు కెన్ పూర్తిగా ప్రదీప్ రంగనాథన్ స్టైల్ ఫాలో అయిపోయి ఈ ‘యూత్’ ని తీర్చిదిద్దిన ఫీలింగ్ అడుగడుగునా కలుగుతుంది. ‘హీరో అల్లరి చిల్లరిగా తిరగడం.. అమ్మాయిలతో ప్రేమలో పడటం.. నాశనమైపోతున్నాడు అనుకునే టైంలో మేల్కొని వాస్తవానికి దగ్గరగా ఆలోచించి కెరీర్లో సక్సెస్ సాధించడం’ వంటివి ప్రదీప్ రంగనాథన్ ‘డ్రాగన్’ సినిమాలో చూసినవే కదా. అందుకే ‘యూత్’ సినిమా కంటెంట్ పరంగా ఎక్కడా కొత్తగా ఉండదు. కానీ హీరో అండ్ ఫ్రెండ్స్ గ్యాంగ్ చేసే కామెడీ కొంతవరకు నవ్విస్తుంది.

అలాగే ఈ సినిమాలో ప్రభాస్ రిఫరెన్సులు చాలా ఉంటాయి. ఛాన్స్ దొరికిన ప్రతిసారి ప్రభాస్ పేరు తీసుకురావడం, అతని పాత సినిమాల్లోని పాటలు వాడటం వంటివి చేశాడు దర్శకుడు. అంతేకాదు సీనియర్ సంగీత దర్శకుడు ఆర్.పి.పట్నాయక్ పాత సినిమాల్లోని పాటల్ని కూడా వాడాడు.ఇలాంటి ఎలిమెంట్స్ బాగున్నప్పటికీ రీల్ కంటెంట్ చూసిన ఫీలింగ్ వస్తుంది తప్ప.. కథకి సింక్ అయ్యే విధంగా ఉండవు. కోర్ పాయింట్ ఏదైతే ఉందో దాని ఎస్టాబ్లిష్మెంట్ బాలేదు. టెక్నికల్ అంశాల విషయానికి వస్తే జీవీ ప్రకాష్ మ్యూజిక్ సినిమాకి ఫ్రెష్ నెస్ తీసుకొచ్చింది. ‘చమికి’ ‘సకియే’ వంటి పాటలు వినసొంపుగా ఉన్నాయి. బ్యాక్ గ్రౌండ్ స్కోర్ కూడా అలరిస్తుంది. సినిమాటోగ్రఫీ, ప్రొడక్షన్ వాల్యూస్ కూడా ఓకే.

విశ్లేషణ: కొన్ని కామెడీ సీన్స్ ఉంటే చాలు టైం పాస్ చేసేయొచ్చు అనుకునే వాళ్ళకి ‘యూత్’ నచ్చుతుందేమో.. కానీ ఒక న్యూ-ఏజ్ యూత్ఫుల్ మూవీ చూసి ఆస్వాదించాలనుకునే వారిని మాత్రం ‘యూత్’ డిజప్పాయింట్ చేస్తుంది.

ఫోకస్ పాయింట్: ‘డ్రాగన్ 2’

రేటింగ్: 2.5/5