“అ ఆ” కు సింగల్ కట్ లేకుండా సెన్సార్ సర్టిఫికెట్

మాటల మాంత్రికుడు, డైరక్టర్ త్రివిక్రమ్ శ్రీనివాస్ తాజా గా తెర కెక్కించిన చిత్రం “అ ఆ”. కుటుంబ విలువల కథాంశంతో రూపుదిద్దుకున్న ఈ చిత్రంలో యువ హీరో నితిన్, సమంతతో జత కట్టారు. “నువ్వే నువ్వే” తర్వాత చిన్న హీరోతో త్రివిక్రమ్ చేసిన సినిమా ఇదే. స్టార్ హీరోలతే హిట్ కొట్టగలడు.. అని తన పై వచ్చిన విమర్శను తొలిగించుకోవడానికి ఈ ప్రయత్నం చేశారు. ఈ మూవీ సెన్సార్ ఫార్మాలిటీస్ పూర్తి చేసుకుంది. సెన్సార్ బోర్డ్ సభ్యులు ఈ సినిమాను చూసి ఒక కట్ కూడా చెప్పకుండా “యు” సర్టిఫికెట్ ను అందించారు.

త్రివిక్రమ్ దర్శకత్వం వహించిన అత్తారింటికి దారేది, సన్నాఫ్ సత్య మూర్తి సినిమాలు హిట్ సాధించి 50 కోట్ల క్లబ్ లో చేరాయి. ఆ తర్వాత చేసిన సినిమా “అ ఆ” కావడం తో దీనిపై భారీ అంచనాలున్నాయి. ఇప్పటికే మిక్కీ జె మేయర్ ఇచ్చిన పాటలు యువతను ఆకట్టుకున్నాయి. ఈ సినిమా అన్ని పనులు పూర్తి చేసుకుని జూన్ 2న రిలీజ్ కావడానికి సిద్దమైంది. అదే రోజు తెలంగాణ ఆవిర్భావ దినం కావడంతో నైజాం ఏరియాల్లో మంచి కలక్షన్లు వస్తాయని చిత్ర బృందం ఆశిస్తోంది.