‘రంగస్థలం’ చిత్రం వచ్చి సంవత్సరం దాటుతున్నప్పటికీ ఇంకా తన తరువాతి చిత్రాన్ని ఇంకా మొదలుపెట్టలేదు సుకుమార్. ముందుగా తన తరువాత చిత్రాన్ని మహేష్ బాబు తో తెరకెక్కించాలని అనుకున్నా… కొన్ని కారణాల వల్ల కుదర్లేదు. మహేష్ కోసం సిద్ధం చేసుకున్న కథనే ఇప్పుడు అల్లు అర్జున్ తో తెరకెక్కించడానికి రెడీ అయ్యాడు. ‘మైత్రి మూవీ మేకర్స్’ భారీ బడ్జెట్ తో ఈ చిత్రాన్ని తెరకెక్కించబోతున్నారట. త్వరలోనే సెట్స్ పైకి వెళ్ళబోతున్న ఈ చిత్రానికి సంబంధించి ఓ ఆసక్తికరమైన వార్త ఒకటి బయటికి వచ్చింది.
రాయలసీమ ప్రాంతంలో ఎర్రచందనం చుట్టూ తిరిగే కాన్సెప్ట్ తో ఈ చిత్రాన్ని రియలిస్ట్ గా తెరకెక్కించబోతున్నాడట సుకుమార్. ఎంటర్టైన్మెంట్ ను కూడా ఏమాత్రం మిస్ కాకుండా సుకుమార్ జాగ్రత్త పడుతున్నాడట. దాదాపు ఏడాదిగా ఈ కథ పై పని చేస్తున్న సుకుమార్… రీసెర్చ్ లో ఎర్ర చందనంకి సంబంధించి ఎన్నో విషయాలు తెలియడంతో పదుల సంఖ్యలో ఇంటరెస్టింగ్ ఎపిసోడ్లు డెవలప్ చేసాడట. వీటన్నిటినీ తెర పై ఆవిష్కరించాలనే ఉద్దేశంతో ఈ ప్రాజెక్ట్ ను ‘బాహుబలి’ తరహాలో రెండు పార్టులుగా తెరకెక్కించాలని డిసైడ్ అయ్యాడట. వెంటనే బన్నీతోనూ అలాగే నిర్మాతలతోనూ ఈ విషయాలను చర్చించి వీలైనంత తొందరగా సెట్స్ పైకి తీసుకెళ్ళాలని సుకుమార్ భావిస్తున్నాడట.
