మే 3 ని టార్గెట్ చేసి మొత్తం 4 తెలుగు సినిమాలు రిలీజ్ అయ్యాయి. అందులో ‘ప్రసన్నవదనం’ (Prasanna Vadanam) ‘ఆ ఒక్కటీ అడక్కు’ (Aa Okkati Adakku) ‘బాక్’ ‘శబరి’ వంటి సినిమాలు ఉన్నాయి. మరో చిన్న సినిమా కూడా ఉంది లెండి. అయితే రిలీజ్ కి ముందు హైప్ ఉన్న సినిమాలు ‘ప్రసన్నవదనం’ తర్వాత ‘ఆ ఒక్కటీ అడక్కు’ అని చెప్పవచ్చు. కానీ రిలీజ్ తర్వాత పాజిటివ్ టాక్ రాబట్టుకున్న సినిమాలు ‘ప్రసన్నవదనం’ ‘శబరి’. పాజిటివ్ రిపోర్ట్స్ వచ్చాయి కాబట్టి..
వీటికే థియేటర్ల వద్ద టికెట్లు తెగుతాయి అని అంతా అనుకుంటారు. అది సర్వసాధారణం. వీకెండ్ కి కచ్చితంగా ‘ప్రసన్నవదనం’ టాప్ లో ఉంటుంది అని జనాలు అనుకున్నా తప్పులేదు. కానీ ఇప్పుడు సీన్ రివర్స్ అయినట్లు కనిపిస్తోంది. ఎందుకంటే తొలిరోజు ‘ప్రసన్నవదనం’ ఆశాజనకంగా ఏమీ లేవు. విచిత్రంగా అల్లరి నరేష్ (Allari Naresh) ‘ఆ ఒక్కటీ అడక్కు’ సినిమాకే నంబర్స్ కాస్త డీసెంట్ గా రిజిస్టర్ అయ్యాయి. తొలి రోజు ‘ఆ ఒక్కటీ అడక్కు’ సినిమా కోటిన్నర వరకు గ్రాస్ ను కలెక్ట్ చేసింది.
‘ప్రసన్నవదనం’ ఓపెనింగ్స్ దీనికంటే తక్కువే. ఇక రెండో రోజు బుకింగ్స్ ను గమనిస్తే.. ఆర్టీసీ క్రాస్ రోడ్స్ లో ‘బాక్'(డబ్బింగ్ సినిమా) కి మంచి నంబర్స్ రిజిస్టర్ అయ్యాయి. తర్వాతి ప్లేస్ లో ‘ఆ ఒక్కటీ అడక్కు’ ఉంది. ‘ప్రసన్నవదనం’ 3 వ ప్లేస్ లో ఉంది. దీనిని బట్టి చూస్తుంటే.. ప్రేక్షకులు థ్రిల్లర్స్ కంటే కామెడీ సినిమాలకే ఇంట్రెస్ట్ చూపిస్తున్నట్టు స్పష్టమవుతుంది.అలా అని ఇదే ఫైనల్ అని చెప్పలేం. వీకెండ్ ఇంకా మిగిలే ఉంది కాబట్టి.. ఇంకా ఏదైనా జరగొచ్చు.
