బాలీవుడ్ నటుడిని ఢీ కొట్టనున్న నాని!

నేచురల్ స్టార్ నాని హీరోగా, నిర్మాతగా చాలా బిజీగా ఉన్నారు. వరుసగా విజయాలను అందుకంటున్న ఈ యువ హీరో ఎంసీఏ తర్వాత  మేర్లపాక గాంధీ దర్శకత్వంలో “కృషార్జున యుద్ధం” సినిమా చేస్తున్నారు. షూటింగ్ చివరి దశకు చేరుకున్న ఈ చిత్రంలో నాని డ్యూయల్ రోల్ పోషిస్తున్నారు. హీరో అతనే.. విలన్ అతనే అని రూమర్లు కొంతకాలంగా షికారు చేశాయి. అయితే అది నిజం కాదని చిత్ర బృందం స్పష్టం చేసింది. ఈ చిత్రంలో విలన్ గా బాలీవుడ్ మోడల్, నటుడు రవి అవన్ నటిస్తున్నాడు. ఇతను పూరి జగన్నాథ్ డైరెక్ట్ చేసిన “ఇజం” సినిమాతో తెలుగు ప్రేక్షకులకు పరిచయమయ్యారు.

ఆ చిత్రంలో పెద్దగా గుర్తింపు సాధించలేకపోయారు. అయితే “కృషార్జున యుద్ధం” సినిమాలో రవి అవన్  డ్రామా, ఎమోషన్ బాగా పలికించారని చిత్ర యూనిట్ తెలిపింది. ఈ మూవీ అతనికి మంచి పేరు తెస్తుందని వెల్లడించింది. అనుపమ పరమేశ్వరన్, రుక్సార్ మీర్ లు హీరోయిన్లుగా నటిస్తున్న ఈ చిత్రానికి హిప్ హాఫ్ తమీజా సంగీతం అందిస్తున్నారు. ఫస్ట్ లుక్స్ తో ఆసక్తి కలిగించిన “కృషార్జున యుద్ధం”  ఏప్రిల్ నెలలో రిలీజ్ కానుంది. దీని తర్వాత నాని నాగార్జునతో కలిసి మల్టీ స్టారర్ మూవీ చేయనున్నారు.