Operation Sindoor: ఆపరేషన్ సిందూర్.. టైటిల్ కోసం డిమాండ్ పెరిగిందా?

బాలీవుడ్‌లో ‘ఆపరేషన్ సిందూర్’ (Operation Sindoor) అనే టైటిల్ కోసం తీవ్రమైన పోటీ నడుస్తోంది. సుమారు 15 నిర్మాణ సంస్థలు ఈ టైటిల్‌ను సొంతం చేసుకునేందుకు ఇండియన్ మోషన్ పిక్చర్ ప్రొడ్యూసర్స్ అసోసియేషన్ (ఇంపా)లో దరఖాస్తు చేసినట్లు సమాచారం. ఈ టైటిల్ ఇంతగా ఆకర్షణీయంగా మారడం ఇప్పుడు ఇండస్ట్రీలో చర్చనీయాంశంగా నిలిచింది. టీ-సిరీస్, జీ స్టూడియోస్ లాంటి ప్రముఖ సంస్థలు కూడా ఈ పోటీలో ఉన్నాయి. ‘ఆపరేషన్ సిందూర్’ పేరుతో భారత సైన్యం ఇటీవల నిర్వహించిన ఒక ఆపరేషన్ నుంచి ప్రేరణ పొందింది.

Operation Sindoor

పహల్గామ్ ఉగ్రదాడికి ప్రతీకారంగా పాకిస్థాన్, పీవోకేలోని ఉగ్రవాద స్థావరాలపై భారత్ ఈ ఆపరేషన్ ద్వారా దాడి చేసి, సుమారు 100 మంది ఉగ్రవాదులను హతమార్చింది. ఈ ఆపరేషన్‌కు ఇద్దరు మహిళా సైనికాధికారులు నేతృత్వం వహించడం అంతర్జాతీయంగా దీనికి గుర్తింపు తెచ్చింది. ఈ నేపథ్యంలో ఈ టైటిల్‌కు సినీ వర్గాల్లో డిమాండ్ పెరిగిందని అంటున్నారు.

ఈ టైటిల్ కోసం దరఖాస్తు చేసిన నిర్మాత అకోశ్ పండిట్ మాట్లాడుతూ, ఈ పేరు చాలా ఆకర్షణీయంగా ఉందని, కానీ టైటిల్ ఆధారంగా సినిమా తీయడం అంత సులువు కాదని అన్నాడు. “నిర్మాతలు ఆసక్తికరమైన టైటిల్స్‌ను ఎంచుకోవడానికి ప్రయత్నిస్తారు, కానీ అందరూ ఈ అంశంపై సినిమా తీస్తారని చెప్పలేం” అని వివరించాడు. అతను పాకిస్థాన్ వల్ల 35 ఏళ్లుగా బాధితుడిగా ఉన్నానని, ఈ ఆపరేషన్ తనకు వ్యక్తిగతంగా కీలకమైన అంశమని చెప్పాడు. మహవీర్ జైన్ ఫిల్మ్స్ ఈ టైటిల్ కోసం ఇంపాలో మొదట దరఖాస్తు చేసిన సంస్థగా తెలుస్తోంది.

‘ఆపరేషన్ సిందూర్’ అనే పేరు భారతీయ సంప్రదాయంలో సిందూరం పవిత్రతను సూచిస్తుంది. ఉగ్రవాదులు మహిళలకు ఈ పవిత్రతను దూరం చేసిన నేపథ్యంలో, ప్రతీకార చర్యగా ఈ ఆపరేషన్‌కు ఈ పేరు పెట్టినట్లు భావిస్తున్నారు. ఈ టైటిల్ భారతీయుల భావోద్వేగాలను ఆకర్షిస్తుందని, సినిమాకు మంచి బజ్ క్రియేట్ అవుతుందని నిర్మాతలు భావిస్తున్నారు. ఈ టైటిల్ చుట్టూ జరుగుతున్న పోటీ బాలీవుడ్‌లో ఆసక్తి రేకెత్తిస్తోంది. ‘ఆపరేషన్ సిందూర్’ (Operation Sindoor) అనే పేరు సినిమాకు ఎంతవరకు సరిపోతుంది, ఈ అంశంపై సినిమా తీస్తే ప్రేక్షకులు ఎలా స్పందిస్తారనే చర్చ ఇప్పుడు నడుస్తోంది.

‘హిట్ 3’ .. లాభాలు వస్తున్నాయి కానీ ..?