కొన్ని సినిమాలు కొంతమందే చేయాలి. ఈ మాటేదో నెగిటివ్‌గా అంటున్నది కాదు. అలాంటి సినిమాలు వాళ్లకే నప్పుతాయి అని, అలాంటి జోనర్‌లో సినిమాలు వాళ్లే చేయాలి అని. అయితే ఇలాంటి నియమాలేవీ లేకుండా, ఎలాంటి సినిమానైనా తనదైన శైలిలో మెప్పించగల నటులు కొంతమంది ఉంటారు. అలాంటి వారిలో ధనుష్ (Dhanush) ఒకరు. సినిమా కోసం ఎంతైనా కష్టపడి, ఎంతైనా మారే జోనర్‌ నటుడు ఆయన. అలాంటి వ్యక్తి దర్శకుడిగా మారి తన సినిమా తానే చేస్తే.. అదే ‘రాయన్’ (Raayan).
‘పా పాండి’ అనే సినిమాతో ఎప్పుడో ఏడేళ్ల క్రితమే దర్శకుడిగా మారిన ధనుష్.. ఆ తర్వాత మళ్లీ అటువైపు వెళ్లేలేదు. అలాంటి ఆయన తన 50వ సినిమాను తానే డైరెక్ట్‌ చేద్దాం అనుకున్నాడు. ఓ యాక్షన్‌ సినిమాను పూర్తి చేశాడు కూడా. అదే రాయన్. జూలై 26న ఈ సినిమా విడుదల కాబోతున్న నేపథ్యంలో ట్రైలర్‌ను చిత్రబృందం ఇటీవల విడుదల చేసింది. ఆ ట్రైలర్‌ చూశాక ‘ధనుష్ సినిమా అంటే ఇలానే ఉంటుంది’, ‘వామ్మో ఆ రక్తపాతమేంటి?’ అని కామెంట్లు చేస్తున్నారు.
రాయన్ (ధనుష్) చాలా సౌమ్యుడు. అతనికి ఇద్దరు తమ్ముళ్లు. కొన్ని పరిస్థితుల వల్ల ఆ ముగ్గురూ నేర ప్రపంచంలోకి అడుగు పెట్టాల్సి వస్తుంది. ఈ క్రమంలో శత్రువు (ఎస్‌జే సూర్య) (SJ Suryah) తప్పించుకోవడానికి కత్తి పడతారు. అడవిలో ప్రమాదకరమైన జంతువు సింహం కాదని, అసలు ప్రమాదం తోడేళ్ల నుండే ఉంటుందని తండ్రి మాటలు గుర్తు చేసుకుని హింస పెంచుతాడు. అసలు ఇలా ఎందుకు చేశాడు అనేదే సినిమా కథ అని ట్రైలర్‌ చూస్తే అర్థమవతోంది.
‘రాయన్’ సినిమా పూర్తి వయొలెంట్ ఎంటర్ టైనర్ అని ట్రైలర్‌ చూసి చెప్పొచ్చు. ‘పుదుపేట్టై’ / ‘ధూల్ పేట్’ సినిమా తర్వాత ఆ రేంజ్‌ రివేంజ్‌ డ్రామా ఇదే అవుతుంది అని సినీ విశ్లేషకులు అంటున్నారు. సన్‌ పిక్చర్స్‌ నిర్మిస్తున్న ఈ సినిమా మీద భారీ ఆశలే పెట్టుకున్నారు అభిమానులు.
