తెలంగాణలో సంధ్య థియేటర్ ఘటన తర్వాత ప్రభుత్వం తీసుకున్న నిర్ణయం చిత్ర పరిశ్రమను ఆందోళనలో పడేసింది. ముఖ్యమంత్రి రేవంత్ రెడ్డి సభలో అల్లు అర్జున్‌పై (Allu Arjun) విమర్శలు చేయడమే కాకుండా, పరిశ్రమ మొత్తం వ్యవహార తీరుపై ఘాటు వ్యాఖ్యలు చేయడం హాట్ టాపిక్‌గా మారింది. టికెట్ ధరల పెంపు, ప్రత్యేక షోల అనుమతులను రద్దు చేస్తామన్న ప్రకటన పరిశ్రమకు పెద్ద షాక్ ఇచ్చింది. “గేమ్ ఛేంజర్” (Game Changer) వంటి భారీ బడ్జెట్ ప్యాన్ ఇండియా సినిమాలు సంక్రాంతి సీజన్‌లో విడుదలకు సిద్ధంగా ఉన్నాయి.
ఈ సినిమా కోసం దిల్ రాజు (Dil Raju) మూడు వందల కోట్లకు పైగా ఖర్చు పెట్టారు. కానీ టికెట్ రేట్లు పెరగకపోవడం, ప్రత్యేక షోల లేని పరిస్థితి ఎదురైతే ఓపెనింగ్ రివెన్యూ తగ్గే ప్రమాదం ఉంది. హైదరాబాద్‌లో సంక్రాంతి సమయంలో ఎక్కువ మంది జనాలు ఊర్లకు వెళ్తారు. ఉదయం షోలు చూసే వీలులేని ప్రజలకు రాత్రి ప్రత్యేక షోలు లేవంటే కలెక్షన్లపై ప్రతికూల ప్రభావం చూపవచ్చు. తెలంగాణ ప్రభుత్వం ఈ నిర్ణయాలు కొనసాగిస్తే ప్యాన్ ఇండియా సినిమాలకు నైజాం మార్కెట్‌లో భారీగా నష్టం వాటిల్లవచ్చు.
“హరిహర వీరమల్లు,” (Hari Hara Veera Mallu) “విశ్వంభర, (Vishwambhara)” “ది రాజా సాబ్” (The Raja saab) లాంటి భారీ చిత్రాలు కూడా ఈ పరిణామాలతో ప్రభావితమవ్వవచ్చు. ఆంధ్రప్రదేశ్‌లో ఇలాంటి సమస్యలు లేకపోవడం కొంతమేర ఆదుకోవచ్చు, కానీ నైజాం మార్కెట్ మీద ఆధారపడి ఉన్న సినిమాలకు తెలంగాణ ప్రభుత్వ విధానాలు పెద్ద సమస్యగా మారే అవకాశాలు ఉన్నాయి. దిల్ రాజు తెలంగాణ ఫిల్మ్ ఫెడరేషన్ చైర్‌మెన్‌గా ఉన్నప్పటికీ, ప్రభుత్వ నిర్ణయాలను మార్చడం ఎంతవరకు సాధ్యం అనేది అనుమానంగా ఉంది.
“గేమ్ ఛేంజర్” వంటి భారీ ప్రాజెక్ట్ కోసం ప్రభుత్వం నుంచి వెసులుబాటు పొందడానికి ఆయన ప్రయత్నాలు చేస్తారనే అభిప్రాయాలు వ్యక్తమవుతున్నాయి. ముఖ్యంగా, రేవంత్ రెడ్డి వంటి నేత కోపంలో ఉన్నప్పుడు పరిస్థితిని ఎలా అదుపులోకి తెస్తారనేది పరిశ్రమలో చర్చనీయాంశంగా మారింది. ఈ పరిస్థితుల మధ్య, దిల్ రాజు ప్రభుత్వం మద్దతు పొందగలిగితేనే “గేమ్ ఛేంజర్”లాంటి ప్రాజెక్ట్‌లు పెద్ద విజయాన్ని సాధించే అవకాశం ఉంటుంది. ఇకపోతే, దిల్ రాజు సహా పరిశ్రమ పెద్దలు ప్రభుత్వ నిర్ణయాలను సవాల్ చేయకుండా, పరిస్థితులకు అనుగుణంగా మారాల్సి రావచ్చు.
