అర్జున్ రెడ్డి సినిమా తర్వాత విజయ్ దేవరకొండ గీత గోవిందం రూపంలో మరో ఘనవిజయాన్ని అందుకున్నారు. పరుశురాం దర్శకత్వంలో చేసిన మూవీ ఆగస్టు 15 న రిలీజ్ అయి భారీ కలక్షన్స్ రాబడుతోంది. గీతా ఆర్ట్స్ 2 బ్యానర్ పై బన్నీ వాసు నిర్మించిన ఈ సినిమా తొలి రోజే ప్రపంచవ్యాప్తంగా దాదాపు 16 కోట్ల గ్రాస్ రాబట్టగా మూడు రోజుల్లో 37.45 కోట్ల గ్రాస్ అందుకొని ఔరా అనిపించుకుంది. తొలి వీకెండ్ నాటికీ 50 కోట్ల మెయిలు రాయిని దాటి పరుగులు పెడుతోంది. ఈ మూవీ తెలుగు రాష్ట్రాల్లోనే కాకుండా తమిళనాడులోనూ జోరు ప్రదర్శిస్తోంది. అక్కడ మూడు రోజుల్లోనే 1.79 కోట్లు కొల్లగొట్టిన ఈ చిత్రం శనివారానికి రెండు కోట్లను అధిగమించి రికార్డు సృష్టించింది.
ఈ ఏడాది తమిళనాడులో ఇంతవరకూ వచ్చిన సినిమాలలో “కడై కుట్టి సింగం” అత్యధిక వసూళ్లను సాధించిన రెండవ చిత్రంగా నిలిచింది. ఆ స్థానానికి “గీత గోవిందం” గట్టిపోటీని ఇస్తోంది. తమిళనాడులో భారీ వసూళ్లు సాధించిన సినిమాగా ‘బాహుబలి’ రికార్డు సృష్టించింది. ఆ రికార్డు ని కూడా గీత గోవిందం తిరగరాసేట్టు ఉందని అక్కడి ట్రేడ్ వర్గాల వారు చెబుతున్నారు. ఈ చిత్రంలో విజయ్ దేవరకొండ నటనతో పాటు, హీరోయిన్ గా నటించిన రష్మిక తన అందం, అభినయంతో యువకుల మనసు దోచుకుంటోందని సినీ విశ్లేషకులు వెల్లడించారు.
