Vishwambhara: నాగీ సినిమా వదిలేసి ‘విశ్వంభర’ కోసం పని చేస్తున్నారా? సాధ్యమేనా?

‘విశ్వంభర’ (Vishwambhara)  సినిమా మీద ఉన్న భారీ అంచనాలను ఒక్క టీజర్‌తో చంపేశారు అని చెప్పాలి. ఆ సినిమా గురించి చాలా రోజులు ఎదురుచూస్తూ వచ్చిన ఫ్యాన్స్‌ టీజర్‌లో విజువల్‌ ఎఫెక్ట్స్‌ చూసి ‘ఓ.. నో..’ అనుకున్నారు. ‘బింబిసార’ (Bimbisara) సినిమాలో విజువల్‌ ఎఫెక్స్ట్‌ విభాగంలోనూ అదరగొట్టిన దర్శకుడు మల్లిడి వశిష్ట  (Mallidi Vasishta) ‘విశ్వంభర’ దగ్గరకు వచ్చేసరికి తేలిపోయారు. దీంతో ఆ సినిమా గురించి లైట్‌ తీసుకున్న ఫ్యాన్స్‌కి ఇప్పుడో వార్త కాస్త ఆసక్తిరేకెత్తిస్తోంది.

Vishwambhara

చిరంజీవి (Chiranjeevi) – మల్లిడి వశిష్ట కాంబినేషన్‌లో తెరకెక్కుతున్న సినిమా ‘విశ్వంభర’. అన్నీ అనుకున్నట్లుగా జరిగి ఉంటే ఈ సినిమా ఈపాటికే రిలీజ్ అయిపోయి ఉండాలి. సినిమా సెట్స్ మీదికి వెళ్లినపుడే 2025 సంక్రాంతికి రిలీజ్ అని ప్రకటించారు. మేకింగ్ విషయంలో కూడా ఆ జోరు చూపిస్తూ వచ్చారు. కానీ మూడు నెలల క్రితం టీజర్ రిలీజ్ అయ్యాక కథ మారిపోయింది. టీజర్లో విజువల్స్, విజువల్ ఎఫెక్ట్స్‌ పట్ల తీవ్ర అసంతృప్తి వచ్చింది.

ఆ కారణమో లేక ‘గేమ్‌ ఛేంజర్‌’కి (Game Changer)  లైన్‌ క్లియర్‌ చేయాలనే ఆలోచనో కానీ ‘విశ్వంభర’ సినిమాను వాయిదా వేశారు. ఈ క్రమంలో విజువల్‌ ఎఫెక్ట్స్‌ మీద రీవర్క్‌ చేస్తున్నారు అని వార్తలొచ్చాయి. ఇప్పుడు ఆ పనిని ప్రముఖ దర్శకుడు నాగ్‌ అశ్విన్‌ (Nag Ashwin) పర్యవేక్షిస్తున్నారు అని వార్తలొస్తున్నాయి. ‘కల్కి 2’ పనుల విషయంలో ఆయన ప్రస్తుతం బిజీగా ఉన్నారు. వాటిని కాస్త పక్కనపెట్టి ‘విశ్వంభర’ కోసం వస్తున్నారు అని ఆ పుకార్ల సారాంశం.

అయితే ఈ విషయంలో ఎలాంటి నిజం లేదు అని తెలుస్తోంది. ప్రస్తుతం నాగ్‌ అశ్విన్‌ ‘కల్కి 2’ స్క్రిప్ట్‌ పనుల్లో బిజీగా ఉన్నారని, వేరే సినిమాను పర్యవేక్షించే అవకాశం లేదు అని అంటున్నారు. అలాగే ‘విశ్వంభర’ విషయంలో వైజయంతి మూవీస్‌ అంత పాజిటివ్‌గా లేదు. ఆ సినిమా మొదలైన తొలి రోజుల్లో పోస్టర్ల వార్‌ కూడా జరిగింది. కాబట్టి ఈ కోణంలో కూడా ఈ కాంబినేషన్‌ను ఊహించలేం అని చెప్పాలి.