సినిమా ఫలితాన్ని బట్టి ఓటీటీ ప్లాన్ మారిపోతోందా?

ఇప్పుడు సినిమాలు థియేటర్లలో ఎలా ఆడినా, వాటి ఆఖరి గమ్యం ఓటీటీనే (OTT) అవుతోంది. కానీ సినిమా హిట్ లేదా ఫట్ అనే విషయాన్ని బట్టి ఓటీటీ రిలీజ్ స్ట్రాటజీ పూర్తిగా మారిపోతోంది. థియేట్రికల్ రిలీజ్ తర్వాత ఓటీటీలో రిలీజ్ అవ్వాలంటే సాధారణంగా ఆరు నుండి ఎనిమిది వారాల గ్యాప్ తప్పనిసరి. కానీ ఈ నిబంధన అంతా హిట్ సినిమాలకు మాత్రమే వర్తిస్తుందని ట్రెండ్ చూస్తే స్పష్టంగా తెలుస్తోంది. బాక్సాఫీస్ వద్ద పెద్ద హిట్ దక్కించుకున్న సినిమాలు థియేటర్లలో జాగ్రత్తగా ఎక్కువ రోజులు ప్రదర్శించబడతాయి.

OTT:

థియేటర్లో ఎంత ఎక్కువ డేస్ రన్ అవుతాయో, నిర్మాతలకు అంత మేలు. అందుకే పెద్ద హిట్లు సాధించిన సినిమాలు ఓటీటీలో రావాలంటే కనీసం 50 రోజులు పట్టేలా ప్లాన్ చేస్తున్నారు. అటు ఓటీటీ ప్లాట్‌ఫామ్‌లు కూడా థియేట్రికల్ రన్‌ను గౌరవిస్తూ, ఆలస్యం చేసినా నాణ్యమైన కంటెంట్ తీసుకురావడానికి మొగ్గు చూపుతున్నాయి. అయితే, ప్లాప్ సినిమాల సంగతి వేరు. థియేటర్ రన్ విఫలమైన వెంటనే రెండో వారం నుంచే ఓటీటీ డీల్స్ క్లియర్ అవుతున్నాయి.

ఇటీవలే విడుదలైన గేమ్ ఛేంజర్ (Game Changer) 28 రోజుల్లోనే డిజిటల్ ప్లాట్‌ఫామ్‌లోకి వచ్చేసింది. అయితే అదే సమయంలో వచ్చిన డాకు మహారాజ్(Daaku Maharaaj), సంక్రాంతికి వస్తున్నాం (Sankranthiki Vasthunam) లాంటి హిట్ సినిమాలు 50 రోజుల తర్వాతే ఓటీటీలోకి రావడానికి సిద్ధమవుతున్నాయి. ఈ విధానం నిర్మాతలకు ఒక మంచి అవకాశాన్ని సద్వినియోగం చేసుకునేలా చేస్తోంది. ఓటీటీ రిలీజ్ ఆలస్యమైతే అడ్వాన్స్ అమౌంట్ ఎక్కువగా లభిస్తుంది. అదే ప్లాప్ సినిమా అయితే, త్వరగా ఓటీటీలో వేయడం ద్వారా కనీసం డిజిటల్ వసూళ్లు సమకూర్చుకోవచ్చు.

ప్రేక్షకులు థియేటర్‌కు వెళ్లకపోయినా, ఓటీటీలో ఒక్కసారి చూసేద్దామా? అనే ఆలోచన వస్తుంది. ఇలా సినిమా విజయం, పరాజయాన్ని బట్టి ఓటీటీ ప్లాట్‌ఫామ్‌లు వ్యూయింగ్ స్ట్రాటజీ మార్చుకుంటున్నాయి. థియేట్రికల్ రన్‌ను హిట్ సినిమాలకు ఎక్కువ గడువు ఇస్తున్నా, ఫట్ సినిమాలను మాత్రం త్వరగా లాక్కొచ్చే ప్లాన్‌లో ఉన్నాయి. ఈ తరహా మార్పులు భవిష్యత్‌లో నిర్మాతలు, ఓటీటీల వ్యూహాలను మరింత ప్రభావితం చేసే అవకాశం ఉంది.