వరుసగా మాస్, యాక్షన్ సినిమాలు తీస్తూ.. సరైన ఫలితాలు రాకపోయినా అదే పంథాలో కొనసాగుతూ రీసెంట్ ఫ్యామిలీ టచ్ ఇచ్చిన హీరో రవితేజ. ‘భర్త మహాశయులకు విజ్ఞప్తి’ అంటూ సంక్రాంతికి ఇద్దరు హీరోయిన్లతో కలసి వచ్చాడు మాస్ మహారాజ్. ఆ సినిమా తర్వాత ఇంకెలాంటి సినిమా అనౌన్స్ చేస్తాడో అని అందరూ అనుకుంటుండగా ‘ఇరుముడి’ అనే సినిమాను అనౌన్స్ చేసి షాకిచ్చాడు. రవితేజ నుండి డివోషనల్ టచ్ ఉన్న సినిమానా? అని చాలామంది ఆశ్చర్యపోయారు. ఆ సినిమా దర్శకుడి పేరు విన్నాక ఇంకా ఆశ్చర్యం వేసింది.
ప్రేమకథలకు, అందులోనూ కాస్త విషాదం ఉన్న ప్రేమకథలకు ప్రజెంట్ దర్శకుల్లో బెస్ట్ ఆప్షన్గా కొన్నేళ్లుగా చెబుతూ వస్తున్న శివ నిర్వాణ దర్శకత్వంలో ఆ సినిమా తెరకెక్కుతుంది అని వార్తలు రావడం ఇంకా ఆశ్చర్యమేసింది. ఇప్పుడు ఈ సినిమా గురించి ఓ ఆసక్తికర విషయం తెలిసింది. ఈ సినిమా కథను శివ తొలుత చెప్పింది తన మాజీ హీరో నాగచైతన్యకట. ‘మజిలి’ సినిమా తర్వాత ఇంకో ప్రాజెక్ట్ చేయాలని ఇద్దరూ చాలా ఏళ్లుగా అనుకుంటున్నారు. ఈ క్రమంలోనే ‘ఇరుముడి’ కథ అతని దగ్గరకు శివ తీసుకెళ్లారట.
చైతూకి కూడా కథ నచ్చిందని, అయితే నిర్ణయం తీసుకోవడానికి టైమ్ తీసుకున్నాడని టాక్. ఇప్పటికే ఆలస్యమైందని భావించిన శివ నిర్వాణ ఆ కథను రవితేజకు చెప్పి ఓకే చేయించుకున్నారట. ఇటు శివ, అటు రవితేజ మైత్రీ వాళ్లకు ఓ సినిమా బాకీ ఉండటంతో ఆ ప్రాజెక్ట్ అలా సెట్ అయిపోయింది అని చెబుతున్నారు. దీంతో ఈ కథ వదిలేసి నాగచైతన్య తప్పు చేశాడా అనే ప్రశ్న వినిపిస్తోంది. మరి దీనిపై క్లారిటీ రావాలంటే సినిమా పూర్తయి విడుదల కావాలి.
ఇక ‘నిన్ను కోరి’ సినిమాతో దర్శకుడిగా అడుగు పెట్టిన శివ నిర్వాణ ఆ తరవాత నాగచైతన్య – సమంతతో ‘మజిలీ’ సినిమా చేశారు. ఆ సినిమా మంచి విజయాన్ని అందుకుంది. ఆ తర్వాత చేసిన ‘టక్ జగదీష్’, ‘ఖుషి’ ఆశించిన ఫలితాలు ఇవ్వలేదు.
