ఎవరూ ఊహించని విధంగా బ్లాక్ బస్టర్ హిట్ సొంతం చేసుకొన్న సినిమా “ఇస్మార్ట్ శంకర్”. హీరో రామ్, డైరెక్టర్ పూరీ జగన్నాధ్, ప్రొడ్యూసర్ ఛార్మీ తప్ప విడుదలకు ముందు ఈ సినిమా హిట్ అవుతుందన్న నమ్మకం ఎవరికీ లేదు. ముఖ్యంగా రెండు ట్రైలర్స్ విడుదలయ్యాక ఉన్న కాస్త నమ్మకం కూడా పోయింది కొందరికి. కానీ.. అందరి అంచనాలను తలక్రిందులు చేస్తూ బ్లాక్ బస్టర్ హిట్ గా నిలిచింది “ఇస్మార్ట్ శంకర్”. రామ్ మార్కెట్ పరంగా అతడి సినిమా 25 కోట్లు వసూలు చేయడమే గగనం.. అలాంటిది ఏకంగా 45 కోట్ల గ్రాస్ ను వసూలు చేసింది ఈ చిత్రం. రామ్ కెరీర్ లో మాత్రమే కాదు పూరీ జగన్నాధ్ కెరీర్ లోనూ బిగ్గెస్ట్ హిట్ గా నిలిచింది. 17 కోట్లకు థియేట్రికల్ రైట్స్ అమ్ముడుపోగా.. ఇప్పటివరకూ 22 కోట్ల లాభాలు ఆర్జించిందట చిత్రం.
ఇప్పటికీ.. చాలా ఏరియాల్లో “ఇస్మార్ట్ శంకర్” హౌస్ ఫుల్ కలెక్షన్స్ తో నడుస్తుండడం విశేషం. ఈ భారీ లాభాలతో పూరీ జగన్నాధ్ అప్పులన్నీ తీరిపోవడం ఖాయమని.. పూరీ డైరెక్టర్ గానే కాక పర్సనల్ గానూ ఈ చిత్రంతో బౌన్స్ బ్యాక్ అయ్యాడని వ్యాఖ్యానిస్తున్నారు. డిస్ట్రిబ్యూటర్లకు కూడా ఈ చిత్రం మంచి లాభాలు తెచ్చిపెట్టింది. మరి ఈ లాభాలతో తన కుమారుడు హీరోగా తెరకెక్కిన “రోమాంటిక్”ను ఇంకెంత భీకరంగా ప్రమోట్ చేస్తారో పూరీ & ఛార్మీ ద్వయం.
