సినీ పరిశ్రమలో ఎవరికైనా మొదటి ఇన్నింగ్స్ కంటే సెకండ్ ఇన్నింగ్స్ నెమ్మదిగానే సాగుతుంది. జగపతి బాబు విషయంలో మాత్రం అది తారుమారు అయింది. హీరోగా కంటే క్యారక్టర్ ఆర్టిస్ట్ గానే అతని అవకాశాలు వెల్లువెత్తుతున్నాయి. అవార్డులు వరిస్తున్నాయి. నాన్నకు ప్రేమతో, శ్రీమంతుడు, రంగస్థలం.. ఇలా స్టార్ హీరోలతో కలిసి విజయాన్ని అందుకుంటున్నారు. తాజాగా అరవింద సమేత వీర రాఘవ సినిమాలోనూ అదిరిపోయే రోల్ పోషించినట్లు టీజర్ స్పష్టం చేసింది. జగపతిబాబు ఫిలిం ఇండస్ట్రీకి వచ్చి 30సంవత్సరాలు పూర్తి అయిన సందర్భంగా ఒక మీడియా సంస్థకు ఇంటర్వ్యూ ఇచ్చారు. అందులో అనేక ఆసక్తికర విషయాలు చెప్పారు.
“నాకు యాక్టింగ్ తప్ప మరే విషయం తెలియకపోవడంతో, మరేరంగానికి సరిపోను అన్న ఉద్దేశ్యంతో, ఇండస్ట్రీలోనే విజయాలు పరాజయాలు ఇలా ఏమి వచ్చినా పట్టించుకోకుండా అడుగులు వేస్తున్నాను” అని అన్నారు. అలాగే ప్రభాస్, ఎన్టీఆర్ గురించి వెల్లడించారు. “నేను ఇప్పటి వరకు ఎంతోమందితో కలిసి నటించినా ప్రభాస్ లాంటి స్వీట్ హార్ట్ ను ఎప్పుడూ చూడలేదు. ఎప్పుడైనా నేను ఫోన్ చేసినప్పుడు పనులు ఒత్తిడి వల్ల ప్రభాస్ కాల్ మిస్ అయితే వందశాతం రిటర్న్ కాల్ చేయడమే కాకుండా చాలా ఆప్యాయంగా మాట్లాడుతాడు” అంటూ ప్రభాస్ పై ప్రశంసలు కురిపించారు. అలాగే తనకు బాగానచ్చిన వాళ్ళలో తారక్ ఒకరని వెల్లడించారు. ప్రస్తుతం జగ్గు భాయ్ మెగాస్టార్ సైరా నరసింహా రెడ్డి లో కీలక రోల్ పోషిస్తున్నారు.
