జగపతిబాబుకి మరో మంచి ఆఫర్!

హీరో టర్నడ్ స్టైలిష్ విలన్ జగపతిబాబుకి మరో మంచి ఆఫర్ లభించింది. ఈమధ్యకాలంలో సరైన సినిమాలు లేక కాస్త జోరు తగ్గించిన జగపతిబాబు “రంగస్థలం”తో మళ్ళీ ఫామ్ లోకి రానున్నాడు. అయితే.. రెగ్యులర్ గా విలన్ పాత్రలు, ప్రత్యేక పాత్రలు చేసీ చేసీ జగ్గూ భాయ్ కి బాగా బోర్ కొట్టేసింది, అందుకే చాలా సినిమాల ఆఫర్లు వస్తున్నప్పటికీ ఆయన సున్నితంగా తిరస్కరిస్తున్నాడు. సెల్వ రాఘవన్ చాలా గ్యాప్ తీసుకొని తెరకెక్కిస్తున్న తాజా చిత్రంలో జగపతిబాబుకి ఒక అద్భుతమైన రోల్ ఆఫర్ చేశాడట. నెగిటివ్ రోలే అయినప్పటికీ బాగా డెప్త్ ఉన్న క్యారెక్టర్ కావడంతో అంగీకరించాడట జగపతిబాబు.

తమిళంలో రూపొందుతున్న ఈ చిత్రంలో సూర్య సరసన రకుల్, సాయిపల్లవి కథానాయికలుగా నటిస్తుండగా.. యువన్ శంకర్ రాజా స్వర సారధ్యం వహించనున్నాడు. ఆల్రెడీ ఒక షెడ్యూల్ పూర్తయిన ఈ చిత్రం సెకండ్ షెడ్యూల్ వచ్చే నెల నుంచి మొదలవ్వనుంది. ఆ షెడ్యూల్ నుంచే జగపతిబాబు కూడా చిత్రీకరణలో పాల్గొంటారని టాక్.

ఇకపోతే.. “వర్ణ” తర్వాత దర్శకుడిగా బ్రేక్ తీసుకొన్న సెల్వ రాఘవన్ సూర్య సినిమాను చాలా జాగ్రత్తగా తెరకెక్కిస్తున్నాడని వినికిడి. ఇప్పటివరకూ సౌత్ ఇండస్ట్రీలో ఎవ్వరూ తీయని కాన్సెప్ట్ తో ఈ చిత్రాన్ని రూపొందిస్తున్నాడట. ఈ సినిమా సక్సెస్ అవ్వడం సెల్వ రాఘవన్ కెరీర్ కి కీలకం కానుంది.