నేను శైలజ మూవీతో కీర్తి సురేష్ తెలుగు ప్రజల మనసులను దోచుకుంది. నేను లోకల్ తో మరో హిట్ తన ఖాతాలో వేసుకుంది. భారీ ప్రాజెక్ట్ లలో అవకాశం పట్టేసింది. అటువంటి వాటిలో పవన్ కళ్యాణ్ సినిమా ఒకటి. త్రివిక్రమ్ దర్శకత్వంలో తెరకెక్కుతోన్న అజ్ఞాతవాసి సినిమాలో ఒక హీరోయిన్ గా నటిస్తోంది. ఈ చిత్రం వేగంగా షూటింగ్ జరుపుకుంటోంది. ఈ సందర్భంగా కీర్తి సురేష్ ఓ పత్రికకు ఇచ్చిన ఇంటర్వ్యూలో పవన్ కల్యాణ్ గురించి అనేక విషయాలు చెప్పింది. “పవన్‌కల్యాణ్ 25వ సినిమాలో నాకు అవకాశం రావడం చాలా ఆనందంగా ఉంది. ఆయన చూడ్డానికి చాలా కామ్ గా ఉన్నట్టు అనిపిస్తారు.
కానీ, పవన్ కు విపరీతమైన సెన్సాఫ్ హ్యూమర్ ఉంది. యూనిట్ అందరూ ఆయన దగ్గర కూర్చుని సరదాగా నవ్వుకుంటుంటాం.” అని పవన్ సెట్స్ లో ఎలా ఉంటారో వివరించింది. ఆమె ఇంకా మాట్లాడుతూ “ఈ సినిమాలో చాలా చమత్కారమైన డైలాగ్స్ ఉన్నాయి. నా పాత్రను త్రివిక్రమ్ చాలా చక్కగా తీర్చి దిద్దారు.” అని కీర్తి మాటల మాంత్రికుడిని అభినందించింది. కీర్తి సురేష్ అజ్ఞాతవాసి సినిమాతో పాటు మహానటి సావిత్రి బయో పిక్ లోను లీడ్ రోల్ పోషిస్తోంది. ఈ రెండు హిట్ అయితే ఆమె టాప్ హీరోయిన్ జాబితాలో చేరిపోతుంది.
Home