సినిమా కోసం అందరూ పడ్డ కష్టం ఒక్కటే. అయితే ఫలితం మాత్రం ఒకేలా ఉండదు. అందుకే ప్రతి సినిమా తర్వాత ఆ నటుల పరిస్థితి మారిపోతూ ఉంటుంది. గత కొన్నేళ్లుగా సినిమా రిలీజ్ తర్వాత ఇబ్బందికర పరిస్థితి ఎదుర్కొంటూ వస్తున్న యువ కథానాయకుడు కిరణ్ అబ్బవరం (Kiran Abbavaram) ఈ దీపావళికి డిఫరెంట్ పరిస్థితుల్ని ఎదుర్కొన్నాడు. తను ఎంతో కాలంగా ఎదురుచూస్తున్న ఆ విజయం వచ్చేసింది. దీంతో ఓ ఎమోషనల్ పోస్ట్ చేశాడు.
కిరణ్ అబ్బవరం నటించిన కొత్త సినిమా‘క’ ఈ రోజు ప్రేక్షకుల ముందుకు వచ్చింది. సినిమాకు మంచి స్పందన వస్తుండటంతో తన మనసు ఆనందంతో నిండిపోయింది అంటూ కిరణ్ అబ్బవరం సోషల్ మీడియాలో పోస్ట్ చేశాడు. చాలా రోజుల తర్వాత ప్రశాంతంగా నిద్రపోతున్నా. ఈ దీపావళి నాకు మరింత సంతోషకరమైన రోజుగా మార్చినందుకు ధన్యవాదాలు అని ఆ పోస్టులో పేర్కొన్నాడు కిరణ్.
కిరణ్ అబ్బవరం నుంచి పాన్ ఇండియా సినిమాగా రూపొందిన ఈ సినిమాకు పెయిడ్ ప్రీమియర్స్లో వచ్చిన టాక్.. ఆ తర్వాత కూడా కొనసాగింది. వాసుదేవ్ అనే వ్యక్తి కథ ఈ సినిమా. అనాథ అయిన వాసుకి పక్కవారి జీవితాల్లో ఏం జరుగుతుందో తెలుసుకోవాలన్న ఉత్సాహం ఎక్కువ. వాళ్ల ఉత్తరాలు చదువుతూ అందులోని ఎమోషన్స్ను ఆస్వాదిస్తుంటాడు. కొన్నాళ్లకు పోస్ట్మేన్ అయ్యాక కృష్ణగిరి అనే ఊరుకు వెళ్తాడు. అక్కడ ఏం జరిగిందన్నది సినిమా.
సస్పెన్స్ థ్రిల్లర్ కథాంశంతో రూపొందిన ఈ సినిమాకు సీక్వెల్ను తీసుకొచ్చే ఆలోచనలో కిరణ్ అబ్బవరం ఉన్నట్లు తెలుస్తోంది. పెయిట్ ప్రీమియర్స్ టాక్ చూశాక.. ఈ నిర్ణయానికి వచ్చారు అని చెబుతున్నారు. ఈ సినిమాకు తొలి సినిమా టీమ్నే కొనసాగించాలని నిర్ణయించుకున్నారు. త్వరలో పూర్తి వివరాలు వెల్లడిస్తారని సమాచారం. పెయిడ్ ప్రీమియర్ టాక్.. ఇప్పుడు కొనసాగుతున్నా.. వసూళ్లు కూడా కొనసాగితే కిరణ్ అబ్బవరం మరింత ఆనందపడతాడు. సగటు సినిమా అభిమాని కూడా అంతే ఆనందానికి గురవుతాడు అని చెప్పాలి.
