తెలుగు సినీ పరిశ్రమలో హీరోలు హ్యాట్రిక్ డైరక్టర్ కొరటాల శివ దర్శకత్వంలో సినిమా చేయాలనీ అనుకుంటుంటే.. కొరటాల మాత్రం పవర్ స్టార్ పవన్ కళ్యాణ్ ని డైరక్ట్ చేయాలని తపిస్తున్నారు. రచయితగా అనేక హిట్ చిత్రాలకు పనిచేసిన శివ డైరక్టర్ గా పెద్ద హీరోలతోనే కెరీర్ ప్రారంభించారు. తొలుత యంగ్ రెబల్ స్టార్ ప్రభాస్ తో మిర్చి తీసి ఇండస్ట్రీ దృష్టిలో పడిన ఈయన, సూపర్ స్టార్ మహేష్ బాబుతో ఇండస్ట్రీ హిట్ కొట్టి టాలీవుడ్ టాప్ డైరక్టర్ల జాబితాలో చేరిపోయారు. యంగ్ టైగర్ ఎన్టీఆర్ తో చేసిన జనతా గ్యారేజ్ అన్ని వర్గాలను ఆకట్టుకోవడంతో హిట్ డైరక్టర్ గా పేరు దక్కించుకున్నారు. ఇప్పుడు మళ్లీ స్టార్ హీరో ప్రిన్స్ తో నాలుగో సినిమా ప్లాన్ చేస్తున్నారు. వారం క్రితం పూజ కార్యక్రమాలు జరుపుకున్న ఈ మూవీ జనవరి నుంచి సెట్స్ మీదకు వెళ్లనుంది.
ఈ పనుల్లో బిజీగా ఉన్నా పవన్ కళ్యాణ్ కోసం మంచి కథను సిద్ధం చేస్తున్నారంట. పవర్ స్టార్ 2019 తర్వాత సినిమాలు చేస్తారో, చెయ్యరోనని, ఎన్నికలలోపే అతనితో సినిమా తీయాలని కొరటాల విశ్వ ప్రయత్నం చేస్తున్నారు. పవన్ సన్నిహితులకు కూడా తన మనసులో మాట చెప్పాడంట. వారు పవన్ కి కొరటాల కోరికను చెప్పడం, అందుకు ఆయన త్వరలో టైమ్ కేటాయించనున్నట్లు తెలిసింది. ప్రస్తుతం కాటమ రాయుడు షూటింగ్ లో బిజీగా ఉన్న పవర్ స్టార్, ఆ తర్వాత చేయనున్న రెండు ప్రాజెక్టులు కూడా ఖరారు అయ్యాయి. తమిళ దర్శకుడు నీసన్, మాటల మాంత్రికుడు త్రివిక్రమ్ శ్రీనివాస్ సినిమాల కోసం వచ్చే ఏడాది డేట్స్ కేటాయించారు. 2017 లో ఏమైనా డేట్స్ ఖాళీ ఉంటే అది కొరటాల అకౌంట్ లోకి వెళ్లనున్నట్లు ఇప్పుడే టాక్ మొదలయింది. ఈ డైరక్టర్ కథ మీద పరిశ్రమ వర్గాలకు ఉన్న నమ్మకం అటువంటిది. కొరటాల, పవన్ కాంబినేషన్లో సినిమా రావాలని అభిమానులు ఎప్పటి నుంచో కోరుకుంటున్నారు.. వారి కోరిక 2018 లో నెరవేరుతుందన్న మాట.
Also, do SUBSCRIBE to our YouTube channel to get latest Tollywood updates.
