పొట్టి నెలలో రాబోయే సినిమాలివి.. అందరికీ చాలా కీలకం మరి!

సంవత్సరంలో అతి చిన్న నెల అయిన ఫిబ్రవరి వచ్చేస్తోంది. మామూలుగా అయితే ఈ నెలలో పెద్దగా సినిమాలు (Movies) రావు. ఎందుకంటే సంక్రాంతి సీజన్‌లో పెద్ద సినిమాలు వచ్చేస్తుంటాయి. కాబట్టి మళ్లీ సమ్మర్‌ సీజన్‌లోనే వస్తాయి. కానీ ఇప్పుడు పరిస్థితులు మారిపోవడంతో ప్రతి నెలలో ఓ పెద్ద సినిమా వచ్చేలా నిర్మాతలు ప్లాన్‌ చేసుకుంటున్నారు. కొన్నిసార్లు రెండు, మూడు పెద్ద సినిమాలు వస్తున్నాయి. అలా ఈ ఫిబ్రవరిలో కూడా కొన్ని సినిమాలు (Movies) రెడీగా ఉన్నాయి. మరో రెండు రోజుల్లో రెండో నెల రాబోతున్న నేపథ్యంలో ఆ సినిమాలేంటి, వాటి కథేంటో చూద్దాం.

Movies

తొలి వారం ఓ పాన్‌ ఇండియా సినిమా ప్రేక్షకుల్ని పలకరించనుంది. నిజానికి గతేడాది డిసెంబరులోనే రావాల్సిన ఈ సినిమా పెద్ద సినిమాల తాకిడితో ఫిబ్రవరికి వచ్చేసింది. అదే ‘తండేల్‌’ (Thandel). నాగచైతన్య (Naga Chaitanya), సాయి పల్లవి  (Sai Pallavi), చందు మొండేటి (Chandoo Mondeti) కాంబినేషన్‌లో అల్లు అరవింద్‌ (Allu Aravind) తెరకెక్కించిన ఈ సినిమా ఫిబ్రవరి 7న వస్తుంది. ఇక సంక్రాంతికి వస్తానని చెప్పిన అజిత్‌ (Ajith ) ‘విదా మయూర్చి’ (Vidaamuyarchi).. ‘పట్టుదల’ (Pattudala)గా మారి ఫిబ్రవరి 6న రానుంది.

ప్రచారంలో పటాసులాగా ఢాం ఢాం అంటూ, విడుదలయ్యాక తుస్‌మనే విశ్వక్‌సేన్‌ (Vishwak Sen) నుండి ఓ సినిమా రెడీగా ఉంది. లేడీ గెటప్‌తో ‘మేడమ్‌’ సినిమాను తలపిస్తున్న ‘లైలా’ను (Lalila) ఫిబ్రవరి 14న రిలీజ్‌ చేస్తున్నారు. మరోవైపు లాంగ్‌ వెయిటింగ్‌ కమ్‌ బ్యాక్‌ను ‘క’తో (KA) ఇచ్చిన కిరణ్ అబ్బవరం (Kiran Abbavaram) తన పాత సినిమా ‘దిల్ రుబా’ను (Dilruba) ఆ రోజే తీసుకొస్తున్నారు. తండ్రీ కొడుకులు, తాతా మనవళ్లుగా మారి చేసిన ‘బ్రహ్మ ఆనందం’ సినిమా  కూడా రెండో వారమే వస్తోంది.

సందీప్ కిషన్ (Sundeep Kishan) – త్రినాధరావు(Trinadha Rao)   – ప్రసన్న కుమార్‌ బెజవాడ (Prasanna Kumar Bezawada) కాంబినేషన్‌లో తెరకెక్కి సంక్రాంతికి వస్తా అని చెప్పి తప్పుకున్న ‘మజాకా’ను ఫిబ్రవరి 21న రిలీజ్‌ చేయనున్నారు. ఇక ‘లవ్ టుడే’ (Love Today) సినిమాతో తెలుగులోనూ పేరు సంపాదించుకున్న ప్రదీప్ రంగనాథన్ (Pradeep Ranganathan) ‘డ్రాగన్’తో (Dragon) అప్పుడే బాక్సాఫీసుకు వస్తాడు. ఇవి కాకుండా బాలీవుడ్‌లో రష్మిక మందన (Rashmika Mandanna) – విక్కీ కౌశల్‌ (Vicky Kaushal) ‘ఛావా’ (Chhaava) కూడా వాలెంటైన్స్‌ డేనే టార్గెట్‌ చేసింది.