చిరంజీవి ఆలోచనలో ఏమైనా మార్పు రావాలా?… ఈ ప్రశ్న అడిగితే ఏ అభిమాని అయినా ఠక్కున చెప్పే సమాధానం ‘రీమేక్‌లు వద్దు’ అని. ఇది కాకుండా ఇంకేమైనా ఉన్నాయా అంటే మరో రెండు రిక్వెస్ట్‌లు కనిపిస్తున్నాయి అభిమాన వర్గాల్లో. ఈ మేరకు సోషల్‌ మీడియాలో రెండు విషయాలు కనిపిస్తున్నాయి కూడా. ఇప్పుడే కాదు చిరంజీవి గత రెండు చిత్రాలు విడులైనప్పుడు కూడా ఈ మాటలు వినిపించాయి. ఇప్పుడు మల్లిడి వశిష్ట సినిమా ఓపెనింగ్‌ సందర్భంగా మరోసారి ఆ మాటలు బయటకు వచ్చాయి.
మెగా156గా వశిష్ట – యూవీ క్రియేషన్స్‌ మూవీ మొదలైంది. మ్యూజిక్‌ సెట్టింగ్స్‌తో సినిమా పనులు ప్రారంభం కాగా, ఆ తర్వాత పూజా కార్యక్రమాలు జరిగాయి. అయితే ఈ సినిమా టీమ్‌ ఎవరు అనే వివరాలు బయటకు వచ్చేసరికి అందులో ఇద్దరు వద్దు అంటూ నెటిజన్లు కామెంట్లు చేస్తున్నారు. ఒకరు ఫ్యాషన్‌ డిజైనర్‌ కాగా, మరొకరు సినిమాటోగ్రాఫర్‌. అవును చిరంజీవికి చాలా రోజులుగా సుస్మిత కొణిదెల ఫ్యాషన్‌ డిజైనర్‌గా ఉన్నారు. ఇక ఈ సినిమాకు సినిమాటోగ్రాఫర్‌గా చోటా.కె. నాయుడు చేస్తున్నారు.
‘జ‌గ‌దేక వీరుడు అతిలోక సుంద‌రి’ సినిమా త‌ర‌హాలో సోషియో ఫాంటసీ క‌థాంశంతో చిరంజీవి 156వ సినిమా రూపొందనుంది. ఈ (Mega 156) సినిమాకు చిరు కెరీర్లోనే అత్య‌ధికంగా రూ.200 కోట్ల బ‌డ్జెట్‌ను కేటాయించారని అంటున్నారు. ఈ సినిమా కథా నేపథ్యం బట్టి ఫ్యాషన్‌ డిజైనర్‌గా నీతా లుల్లా లాంటివాళ్లు అయితే బాగుంటుంది అని అభిమానుల ముచ్చట. అలాగే ఇలాంటి సినిమాలకు చోటా కె.నాయుడు లాంటి సినిమాటోగ్రాఫర్‌ కాకుండా అలాంటి సినిమాలు హ్యాండిల్‌ చేసిన అనుభవం ఉన్న వ్యక్తి అయితే బాగుండు అనేది ఫ్యాన్స్‌ ఆలోచన.
వాళ్ల పనితనం విషయంలో వంక పెట్టడానికి ఎక్కడా లేదు. అయితే సినిమా నేపథ్యం ప్రకారం వారి స్థానంలో వేరొకరు ఉంటే బాగుంటుంది అనేది అభిమానుల కోరిక. మరి ఈ మాటలు చిరంజీవి వరకు వెళ్తాయా? వెళ్తే వాటిని ఆయన పరిగణలోకి తీసుకుంటారా అనేది చూడాలి.
భగవంత్ కేసరి సినిమా రివ్యూ & రేటింగ్!
లియో సినిమా రివ్యూ & రేటింగ్!
టైగర్ నాగేశ్వరరావు సినిమా రివ్యూ & రేటింగ్!
