డాలీ దర్శకత్వంలో పవర్ స్టార్ పవన్ కళ్యాణ్ నటిస్తున్న కాటమరాయుడు షూటింగ్ వేగంగా జరుగుతోంది. ఇందులో పవన్ ఫ్యాక్షన్ లీడర్ గా కనిపించనున్నారు. రాయలసీమ నేపథ్యంలో సాగే ఈ చిత్రంలో శృతిహాసన్, యామిని భాస్కర్ లు హీరోయిన్లుగా నటిస్తున్నారు. నిర్మాత శరత్ మరార్ నిర్మిస్తున్న ఈ మూవీలో కాటమరాయుడికి తమ్ముళ్లుగా అజయ్, కమల్ కామరాజ్, శివబాలాజీ నటిస్తున్నారు. వీరితో పాటు నందమూరి హీరో కూడా కీలక రోల్ పోషించనున్నట్లు తాజాగా తెలిసింది. విలన్ బృందంలో ఒకరిగా తారక రత్న వీరంగం సృష్టించనున్నట్లు వార్తలు గుప్పుమన్నాయి.
హీరోగా అవకాశాలు తగ్గడంతో తారక రత్న విలన్ పాత్రలకు సై అన్నారు. అమరావతి మూవీలో నటనకు గాను ఉత్తమ విలన్ గా నంది అవార్డు అందుకున్నారు. రీసెంట్ గా మనమంతా చిత్రంలో క్యారక్టర్ ఆర్టిస్ట్ గా నటనను ప్రదర్శించారు. ఇలా తాను చిన్న పాత్రలు చేయడానికి సిద్ధమని గ్రీన్ సిగ్నల్ ఇచ్చారు. ఇప్పుడు కాటమరాయుడులో పవన్ కి ఎదురెళ్లనున్నట్లు సమాచారం. ఆయన కాటమరాయుడు షూటింగ్ స్పాట్ లో ఉన్న ఫోటోలు ప్రస్తుతం సోషల్ మీడియాలో చక్కర్లు కొడుతున్నాయి. మెగా, నందమూరి ఫ్యామిలీ హీరోలను ఒకే సినిమాలో చూడాలని అభిమానులు ఎప్పటినుంచో కోరుకుంటున్నారు. ఈ చిత్రం ద్వారా నెరవేరుతుందేమో చూడాలి. అనూప్ రూబెన్స్ సంగీతమందిస్తున్న ఈ మూవీ ఉగాదికి విడుదల కానుంది.
Also, do SUBSCRIBE to our YouTube channel to get latest Tollywood updates.
