ఈ సమ్మర్ కి విడుదలైన నాని ‘జెర్సీ’ చిత్రం సూపర్ హిట్ గా నిలిచిన సంగతి తెలిసిందే. రెండు ప్లాపులతో సతమతమవుతున్న నానికి ఈ చిత్రం పెద్ద రిలీఫ్ ఇచ్చింది. ‘మళ్ళీ రావా’ ఫేమ్ గౌతమ్ తిన్ననూరి డైరెక్షన్లో తెరకెక్కిన ఈ స్పోర్ట్స్ డ్రామా నాని కెరీర్ లోనే బెస్ట్ మూవీ అని చెప్పుకోవచ్చు. మాస్ జనాల్ని పక్కన పెడితే… మల్టీప్లెక్స్ ఆడియన్స్ కు ఈ చిత్రం తెగ నచ్చేసింది. ఎన్టీఆర్, అల్లు అర్జున్ వంటి స్టార్ హీరోలు కూడా ఈ చిత్రం పై ప్రశంసలు కురిపించిన సంగతి తెలిసిందే.
ఇప్పుడు ఈ చిత్రాన్ని బాలీవుడ్ లో కూడా రీమేక్ చేయబోతున్నారట. అందుతున్న సమాచారం ప్రకారం బాలీవుడ్ స్టార్ ప్రొడ్యూసర్ కరణ్ జోహార్ ‘జెర్సీ’ యొక్క హిందీ రీమేక్ హక్కులను సొంతం చేసుకున్నాడట. ఈ రీమేక్ ను కూడా గౌతమ్ తిన్ననూరి డైరెక్ట్ చేయబోతున్నాడని సమాచారం. ఇక హిందీ వెర్షన్‌ లో నాని పాత్రని షాహిద్ కపూర్ చేయబోతున్నాడట. ఈ మధ్యే ‘అర్జున్ రెడ్డి’ రీమేక్ అయిన ‘కభీర్ సింగ్’ తో భారీ హిట్టందుకున్నాడు షాహిద్. ఇప్పుడు మరో రీమేక్ లో నటించడానికి రెడీ అవుతున్నాడన్న మాట. మొత్తానికి ‘జెర్సీ’ వంటి మంచి సినిమాని బాలీవుడ్ కూడా గుర్తించడం మంచి విషయమే..!
