బాలయ్య అయిపోయాడు.. ఇప్పుడు పవన్ పై పడ్డాడు

ఏదైనా సినిమా మొదలు పెట్టాడంటే… మొదటి నుండీ సోషల్ మీడియాను ఉతికి ఆరేయడం రాంగోపాల్ వర్మకు బాగా అలవాటు. ఇది అందరికీ తెలిసిన సంగతే. అయితే ఈసారి ప్రత్యేకంగా చెప్పుకోవాలి. ఎందుకంటే మెగా అభిమానులంతా మెగాస్టార్ చిరంజీవి పుట్టినరోజు వేడుకలు జరుపుకుంటూ సరదాగా గడుపుతుంటే… వారికి అభిమానులకు చిరాకు తెప్పించేలా పవన్ కళ్యాణ్ కి సంబందించి ఓ పోస్టర్ ని వదిలి తన ట్వీట్ తో కొత్త తరహా వివాదానికి తెర లేపాడు వర్మ.

విషయం ఏమిటంటే… ఆర్జీవీ ‘కమ్మ రాజ్యంలో కడప రెడ్లు’ అనే సినిమా చేస్తున్నట్లు ప్రకటించిన సంగతి తెలిసిందే. ఇక ‘ఈ సినిమాలో ఈ కొత్త నటుడు చేయబోతున్న పాత్ర ఎవరిదో చెప్పగలరా’ అంటూ పవన్ కళ్యాణ్ స్టైల్ లో నిలబడిన ఓ కొత్త నటుడు ఫోటోని షేర్ చేశాడు వర్మ. ఈ ఫోటోలోని వ్యక్తి అచ్చు గుద్దినట్టు పవన్ కళ్యాణ్ లానే ఉన్నాడు. కానీ ఆ ఫోటో పవన్ కళ్యాణ్ ది కాదు. ఈ చిత్రంలో పవన్ కళ్యాణ్ పాత్రకి సంబంధించిన సీన్లు ఉండబోతున్నట్టు ఈ ఫోటోతో చెప్పకనే చెప్పాడు వర్మ. ప్రస్తుతం ఆ ఫొటో సోషల్ మీడియాలో తెగ వైరలవుతుంది. ‘లక్ష్మీస్ ఎన్టీఆర్’ టైంలో బాలయ్యని ఓ ఆట ఆడుకున్న వర్మ ఈసారి పవన్ కళ్యాణ్ పై పడ్డాడు. మరి ఈ సినిమాలో పవన్ కళ్యాణ్ ను ఎలా చూపించబోతున్నాడో అనే ఆసక్తిని రేపాడు వర్మ.