Suriya: సూర్య మరో ప్రయోగం… ఈసారి ఏకంగా 20 ఏళ్లు తగ్గించి!

సినిమా కోసం ప్రయోగాలు చేయాలన్నా, శరీరాన్ని ప్రయోగశాలగా మార్చాలన్నా… కొంతమంది హీరోలు అస్సలు బెరుకు లేకుండా ముందుకొస్తుంటారు. అలాంటివారిలో సూర్య ఒకరు. కమర్షియల్‌ సినిమా హీరోనే అయినా… ప్రయోగం అంటే నేను రెడీ అనేస్తుంటారు. తాజాగా మరోసారి తన శరీరాన్ని ప్రయోగం కోసం సిద్ధం చేస్తున్నారు అని టాక్‌. 48 ఏళ్ల సూర్య తన తర్వాతి సినిమా కోసం 28 ఏళ్ల యువకుడిలా కనిపించే ప్రయత్నం చేస్తున్నాడట. అంటే 20 ఏళ్ల వయసు తగ్గించుకుంటాడు అన్నమాట.

సూర్య హీరోగా ‘సూరారై పొట్రు’ అదేనండీ ‘ఆకాశం నీ హద్దురా’ అనే సినిమా చేసిన సుధా కొంగర గుర్తున్నారా. ఇప్పుడు ఆమెతో సూర్య మరో సినిమా చేస్తున్న విషయం తెలిసిందే. ఈ సినిమా కోసమే సూర్య ఇప్పుడు 28 ఏళ్ల యువకుడిలా మారబోతున్నాడట. కాలేజీ స్టూడెంట్ రోల్‌లో కనిపించడానికి అలా చేస్తున్నాడని కోలీవుడ్ టాక్. అది కూడా కొన్ని సన్నివేశాల కోసమే అని కూడా అంటున్నారు. ఆ కీలకమైన ఎపిసోడ్ కోసం బరువు తగ్గాలని సూర్య అనుకుంటున్నాడట.

‘యువ’ సినిమాలో సూర్యను చూసుంటారు కదా… అలా మరోసారి చూపించే ప్రయత్నమే ఇప్పుడు సుధా కొంగర చేస్తున్నారట. దాని కోసమే బరువు తగ్గి, లుక్‌ మార్చుకునే ఆలోచనలో ఉన్నాడట. అయితే వెంట వెంటనే బరువు తగ్గి, పెరగడం ఆరోగ్య సమస్యలు తీసుకొస్తుందేమో అనే కన్సర్న్‌ ఒకటి ఉందట. దీంతో ఈ విషయంలో ఇంకా ఫైనల్‌ నిర్ణయం రాలేదు అని అంటున్నారు.

ఇక (Suriya) సూర్య 43వ సినిమాగా రూపొందుతున్న ఈ చిత్రంలో దుల్కర్ సల్మాన్, నజ్రియా ఇతర ముఖ్యపాత్రధారులు. జీవీ ప్రకాష్ కుమార్ సంగీత అందిస్తున్నాడు. అన్నట్లు అతనికిది వందో సినిమా అట. ఈ సినిమాను సూర్య సొంత నిర్మాణ సంస్థ 2డీ ఎంటర్టైన్మెంట్, భారీ చిత్రాల నిర్మాణ సంస్థ హోంబలే ఫిల్మ్స్ కలసి నిర్మిస్తాయని అంటున్నారు. త్వరలో ఈ విషయంలోనూ క్లారిటీ వస్తుందని చెబుతున్నారు. సినిమా లుక్‌తో ఇలాంటి చాలా విషయాల్లో క్లారిటీ వచ్చేస్తుంది.

‘బిగ్ బాస్ 7’ వైల్డ్ కార్డ్ ఎంట్రీ నయనీ పావని గురించి 10 ఆసక్తికర విషయాలు!

‘పుష్ప’ టు ‘దేవర’.. 2 పార్టులుగా రాబోతున్న 10 సినిమాలు..!
‘బిగ్ బాస్ 7’ వైల్డ్ కార్డ్ ఎంట్రీ అశ్విని శ్రీ గురించి 10 ఆసక్తికర విషయాలు!