పవన్, త్రివిక్రమ్ కలయికలో మూడో సినిమా

పవర్ స్టార్ పవన్ కల్యాణ్, మాటల మాంత్రికుడు త్రివిక్రమ్ కలిస్తే ఆ సినిమా హిట్టే. వీరిద్దరి కాంబినేషన్లో వచ్చిన ‘జల్సా’ విజయం సాధించగా, ‘అత్తారింటికి దారేది’ బ్లాక్ బస్టర్ గా నిలిచింది. దీంతో వీరి కలయికలో వచ్చే మూవీ పై భారీ క్రేజ్ ఏర్పడింది. ఎప్పుడు వస్తుందా ? అని అభిమానులు సైతం ఎదురుచూసారు. పవన్ పుట్టిన రోజుని పురస్కరించుకొని హారికా హాసిని క్రియేషన్స్ వారు మంచి మాటని చెప్పారు. పవన్, త్రివిక్రమ్ కాంబినేషన్లో సినిమా ఉంటుందని స్పష్టం చేశారు. ఈ సినిమాను నిర్మాత ఎస్. రాధ కృష్ణ నిర్మిస్తున్నట్లు ప్రకటించారు. ప్రస్తుతం డాలీ దర్శకత్వంలో పవర్ స్టార్ ‘కాటమరాయుడు’ సినిమా చేస్తున్నారు. ఈ మూవీతో పాటు సమాంతరంగా త్రివిక్రమ్ సినిమాలో నటించడానికి పవన్ అంగీకరించారని తెలిసింది.

అయితే త్రివిక్రమ్ మాత్రం ‘కాటమరాయుడు’ పూర్తి అయినా తర్వాతే మొదలు పెడదామని చెప్పినట్లు సమాచారం. అప్పటి వరకు వెయిట్ చేయడానికి తనకి ఇబ్బంది ఏమి లేదని వివరించినట్లు ఫిల్మ్ నగర్ వాసులు చెప్పుకుంటున్నారు. త్రివిక్రమ్ తో సినిమా చేయడానికి హీరోలు, నిర్మాతలు క్యూలో ఉన్నా పవన్ తోనే సినిమా చేయడానికి మాటల మాంత్రికుడు ఆసక్తిగా ఉన్నారు. వీరి సినిమా జనవరిలో సెట్స్ మీదకు వెళ్లనుంది.