సినిమాల్లోకి వచ్చేది లేదని స్పష్టం చేసిన పవన్ కళ్యాణ్

ఓ అగ్ర కథానాయకుడి సినిమాలో పవన్ కళ్యాణ్ అతిధి పాత్ర పోషిస్తున్నారంటూ హల్ చల్ చేసిన వార్తలకు సమాధానంగా నిన్న సాయంత్రం పవర్ స్టార్ పవన్ కళ్యాణ్ స్వయంగా “నేను ఇకపై సినిమాల్లో నటించను, నా జీవితం ప్రజా సేవాకే అంకితం” అని ప్రెస్ నోట్ రిలీజ్ చేసిన విషయం తెలిసిందే. ఈ విషయమై పవన్ కళ్యాణ్ అభిమానులు దిగ్భ్రాంతికి గురైనప్పటికీ.. తమ ప్రియతమ కథానాయకుడు ప్రజాసైనికుడిగా కొనసాగుతాడని సంతోషపడ్డారు. అయితే.. పవన్ కళ్యాణ్ ప్రకటనతో ఆయన అభిమానులందరికంటే ఎక్కువగా బాధపడింది మాత్రం మైత్రీ మూవీ మేకర్స్.

“అజ్ణాతవాసి” విడుదలకు ముందు మైత్రీ మూవీ మేకర్స్ పవన్ కళ్యాణ్ హీరోగా ఒక సినిమా నిర్మించాలని నిశ్చయించుకొని ఆయనకు భారీ మొత్తం అడ్వాన్స్ కూడా ఇచ్చారు. అయితే.. “అజ్ణాతవాసి” డిజాస్టర్ అవ్వడం, ఆ తర్వాత సినిమాలకు స్వస్తిపలికి ప్రజాసేవకే అంకితం అవ్వాలని డిసైడ్ అవ్వడంతో మైత్రీ బ్యానర్ లో సినిమా లేనట్లే అనుకొన్నారందరూ. మొన్నామధ్య మీడియా ఇంటర్వ్యూస్ లో మైత్రీ నిర్మాతలు త్వరలోనే పవన్ కళ్యాణ్ తో సినిమా ఉంటుంది అని చెప్పడంతో అభిమానులు కూడా ఆనందపడ్డారు. కానీ.. నిన్న పవన్ కళ్యాణ్ కన్ఫర్మేషన్ తో క్లారిటీ వచ్చింది. మరి ఇప్పుడు మైత్రీ అడ్వాన్స్ లను పవన్ కళ్యాణ్ తిరిగి ఇచ్చేస్తాడా? లేక ఆ డబ్బుకి బదులు మెగా ఫ్యామిలీ హీరోల ద్వారా లెక్క సారి చేస్తాడా అనేది తెలియాల్సి ఉంది.