రెండోసారి కంటి ఆపరేషన్ చేయించుకున్న పవన్ కళ్యాణ్

సినిమాల్లోంచి రాజకీయాల్లోకి వెళ్లిన తర్వాత పవన్ కళ్యాణ్ మరింత బిజీ అయిపోయారు. తన సమస్యలను, ఆరోగ్యాన్ని పట్టించుకోకుండా ప్రజల సమస్యలను తెలుసుకునేందుకు గ్రామాల చుట్టూ తిరుగుతున్నారు. ఇలా తన ఆరోగ్యాన్ని అశ్రద్ధ చేయడం వల్ల రెండు సార్లు ఆపరేషన్ చేయించుకోవాల్సి వచ్చింది. పవన్ కొన్ని నెలలుగా కంటి సమస్యతో బాధపడుతున్న సంగతి తెలిసిందే. గత నెల ఎడమ కంటిపై కురుపుకు ఆపరేషన్ జరిగింది. కొన్ని రోజుల పాటు రెస్ట్ తీసుకోవాలని వైద్యులు సూచించారు. అయినా వినకుండా నల్లటి అద్దాలు వాడుతూ జనసేన ప్రజా పోరాట యాత్రలో పాల్గొన్నారు. దీంతో కంటికి ఇన్ఫెక్షన్ వచ్చింది.

ఈరోజు ఆయనకు మరొకసారి కంటి ఆపరేషన్ నిర్వహించారు. హైదరాబాద్ బంజారా హిల్స్ లోని సెంటర్ ఫర్ సైట్ ఆసుపత్రి వైద్యులు డాక్టర్ సంతోష్ ఎంతో జాగ్రత్తగా ఈ ఆపరేషన్ నిర్వహించారు. ఆపరేషన్ అనంతరం పవన్ ఉత్సాహంగా కనిపించారు. అయితే ఆయనకు కొద్దిరోజులపాటు విశ్రాంతి అవసరమని వైద్యులు చెప్పారు. అందుకే జనసేనాని కొన్ని రోజుల పాటు ఇంటికే పరిమితం కానున్నారు. ఈ విషయాన్నీ జనసేన పార్టీ మీడియా హెడ్ పి హరి ప్రసాద్ ఒక ప్రకటన ద్వారా వెల్లడించారు. పూర్తిగా కోలుకున్న తర్వాత ప్రజా పోరాట యాత్రను పవన్ కొనసాగించనున్నారు.