ముంబై బ్యూటీ కామ్నాజఠ్మలానీ తెలుగులో ప్రేమికులు సినిమా ద్వారా పరిచయమైంది. ఆ తర్వాత చేసిన రణం మూవీ ఆమెకు మంచి విజయాన్ని అందించింది. సైనికుడు సినిమాలో మహేష్ తో కలిసి ఓ పాటలో స్టెప్పులు వేసింది. తెలుగుతో పాటు తమిళం, మలయాళంలో సినిమాలు చేసిన కామ్నాకి మంచి బ్రేక్ ఇవ్వలేకపోయింది. దీంతో మూడేళ్ళ క్రితం బెంగళూరు కు చెందిన పారిశ్రామికవేత్త సూరజ్ నాగ్ పాల్ ను వివాహం చేసుకుని.. నటనకు దూరమైంది. నిన్న ఆమె మరుపల్లిలోని బాలాజీ పాలిటెక్నిక్‌ కళాశాల ఏడో వార్షికోత్సవ కార్యక్రమానికి హాజరయింది .
ఈ ఫంక్షన్ అనంతరం ఆమె మీడియాతో మాట్లాడారు. “నా కెరీర్ తెలుగు సినిమాలతోనే మొదలయింది. రణం, బెండు అప్పారావు ఆర్‌ఎంపీ సినిమాలు నాకు మంచి పేరు తెచ్చి పెట్టాయి. మూడు భాషల్లో నటించాను. అయినా తెలుగు ఇండస్ట్రీ అంటే నాకు చాలా ఇష్టం. టాలీవుడ్ నాకు కుటుంబం లాంటిది” అని వెల్లడించింది. తెలుగు మీకిష్టమైన హీరో ఎవరు ? అని ప్రశ్నించగా.. ” ప్రభాస్, పవన్ కళ్యాణ్ లకు నేను అభిమానిని. ఎన్టీఆర్ డ్యాన్స్ అంటే చాలా ఇష్టం” అని వెల్లడించింది. ఆమె పెళ్లి తర్వాత కన్నడలో ఓ హారర్ సినిమా చేస్తోంది. ఈ చిత్రం జూన్ లో విడుదల కానుంది.
