అందరూ వినాయక చవితి జరుపుకుంటే.. ‘పెద్ది’ టీమ్ మాత్రం పెద్దగా ప్లాన్ చేసిన సాంగ్ షూటింగ్లో బిజీగా ఉంది. దర్శకుడు బుచ్చిబాబు సానా సోషల్ మీడియా పోస్టు ఈ విషయాన్నే తెలియజేస్తోంది. గణేశ్ చతుర్థి సందర్భంగా ‘పెద్ది’ సినిమా టీమ్ ఓ స్పెషల్ వీడియో రిలీజ్ చేసిన విషయం తెలిసిందే. అందులో విషెష్ చెప్పడంతోపాటు.. ఓ పాట షూటింగ్ అవుతోంది అనే అప్డేట్ కూడా ఇచ్చారు. టీమ్ చెప్పినట్లే భారీగా ఈ పాట చిత్రీకరణ జరుగుతోంది అని సమాచారం.
‘పెద్ది’ సినిమా చిత్రీకరణ ప్రస్తుతం కర్ణాటకలో మైసూరు పరిసర ప్రాంతాల్లో జరుగుతోంది. వెయ్యి మందికిపైగా డ్యాన్సర్లతో హీరో ఇంట్రడక్షన్ సాంగ్ను చిత్రీకరిస్తున్నారు. రెహమాన్ డప్పు… రామ్చరణ్ స్టెప్పు అదిరిపోతాయంటూ బుచ్చిబాబు సానా సోషల్ మీడియాలో ఓ పోస్టు కూడా పెట్టారు. ఈ పాటకు జానీ మాస్టర్ కొరియోగ్రఫీ చేస్తున్నారు. సినిమా టీమ్ రిలీజ్ చేసిన విషెస్ వీడియోలో జానీ మాస్టర్ కూడా కనిపించారు. వివాదాల తర్వాత చరణ్తో కలసి జానీ మాస్టర్ కొరియో చేసిన తొలి సినిమా ఇది.
ఇక ఈ సినిమా గురించి చూస్తే.. గ్రామీణ నేపథ్యంతో రూపొందుతున్న స్పోర్ట్స్ డ్రామా ఇది. ఇందులో చరణ్ ఆట కూలీగా కనిపిస్తాడని సమాచారం. అంటే అన్ని ఆటలూ వచ్చినా.. అవసరానికి తగ్గట్టు ఆడుతుంటాడు. దీని వెనుక ఓ కారణం ఉంటుందని, క్లైమాక్స్లో తనకు ఇష్టమైన ఆట ఆడతాడని.. అదెందుకు అనేది సినిమా చూస్తేనే తెలుస్తుంది అని అంటున్నారు. జాన్వీ కపూర్ హీరోయిన్గా నటిస్తున్న ఈ సినిమాను వృద్ధి సినిమాస్ పతాకంపై వెంకట సతీశ్ కిలారు నిర్మిస్తున్నారు. మైత్రీ మూవీ మేకర్స్, సుకుమార్ రైటింగ్స్ సమర్పిస్తున్నాయి. ఇక ఈ సినిమాను రామ్ చరణ్ పుట్టిన రోజు సందర్భంగా వచ్చే ఏడాది మార్చి 27న విడుదల చేస్తున్నారు.
