ఫణీంద్ర నారిశెట్టి (Phanindra Narsetti).. ఈ పేరు గత కొన్ని రోజులుగా సినిమా వర్గాల్లో, సోషల్ మీడియాలో వినిపిస్తూనే ఉంది. దానికి కారణం ఆయన తెరకెక్కించిన ‘8 వసంతాలు’ (8 Vasantalu) ఒకటైతే.. ఆ సినిమా ప్రచారంలో భాగంగా ఆయన చేసిన వ్యాఖ్యలే కారణం. ఇప్పుడు సినిమా రిలీజ్‌ అయ్యాక కూడా ఈ చర్చ ఆగడం లేదు. ఆయన కామెంట్లు కూడా ఆగడం లేదు. దానికితోడు సినిమాలో చూపించిన కొన్ని సీన్స్‌ ఈ పరిస్థితిని ఇంకా ఇబ్బందిలోకి నెట్టాయి. రీసెంట్‌గా జరిగిన సినిమా సక్సెస్‌ మీట్‌లో యాంకర్‌ చేసిన పనికి ఇంకాస్త రచ్చ జరుగుతోంది. ఈ క్రమంలో దర్శకుడు ఫణీంద్ర సోషల్ మీడియాలో ఓ పోస్టు పెట్టారు.
దీంతో ఈ విషయాన్ని ఆయన ఇంత త్వరగా వదిలేలా లేరు.. ఇంకాస్త లప్చర్‌ అయ్యేలా ఉంది అని అర్థమవుతోంది. కాశీ పుణ్య క్షేత్రంలో ఫైట్ సీక్వెన్స్, రేప్ సీక్వెన్స్ తీయడానికి కబేళా కావాల్సి వచ్చిందా? అంటూ ప్రెస్‌ మీట్‌లో ఓ విలేకరి ప్రశ్నించడం కూడా ఫణీంద్ర (Phanindra Narsetti) పోస్టుకు కారణం అని చెప్పొచ్చు. ఈ క్రమంలో ఫణీంద్ర (Phanindra Narsetti) వివరణ ఇచ్చినా అది అంత సాఫీగా లేదు అని చెప్పాలి. ఇక ఆయన పోస్టు విషయానికొస్తే..బ్రాహ్మణ వర్గం పట్ల నాకు అమితమైన గౌరవం ఉంది. వారి నాలుకపై సరస్వతి కొలువై ఉంటుందంటారు. విలేకరుల సమావేశంలో ఒక వర్గం పైనే ముద్ర వేస్తూ అత్యాచారం గురించి ఎందుకు మాట్లాడాల్సి వచ్చిందో నాకు అర్థం కావడం లేదు.
ఎవరైనా వారి విచక్షణా స్వభావం కారణంగానే నేరాలు చేస్తారు. అంతేకానీ కులం, మతం ఆధారంగా ఆ పనులు చేయరు. సామాజిక హోదాకు భిన్నంగా ప్రజలు ఉంటారని నేను చూపించే ప్రయత్నమే సినిమాలో మీరు చూశారు. అలా అని ఒక వర్గాన్ని వేలెత్తి చూపే ప్రయత్నం చేయలేదు అని ఫణీంద్ర (Phanindra Narsetti)ఆ పోస్టులో పేర్కొన్నారు. ఇక కబేళా అనేది ఎప్పటి నుండో ఉంది. అది ఒకే దగ్గర ఉండాలని లేదు.. ఎక్కడైనా ఉండొచ్చు. అందుకు తగినట్లుగానే సినిమాలో పాత్రలను ఎంపిక చేసుకున్నాను. మీరు ఈ విషయంలో కులాన్ని తీసుకురావాలనుకుంటే, మిమ్మల్ని ఒక ప్రశ్న అడుగుతా. రావణుడు ఎవరు? ఆయన ఒక బ్రాహ్మణుడి కుమారుడు.
గొప్ప శివభక్తుడు. నుదుటిపై విభూతిధారణ చేస్తాడు. మెడలో రుద్రాక్షలు వేస్తాడు. మరి ఆయనలో మారింది ఏంటి? ఉన్నత వర్గం నుండి వచ్చి వేదాలు, పురాణ గ్రంథాలను అవపోసన పట్టి చివరకు ఏం చేశాడు అని ఫణీంద్ర (Phanindra Narsetti) ప్రశ్నించారు. మనిషి తన ప్రవర్తన, ఆలోచనా ధోరణి బట్టే నేరం చేస్తాడు. అంతే కానీ మతం, కులం ఆ ప్రవర్తనకు కారణం కాదు. యద్భావం తద్భవతి అంటారు. అంటే మీరు ఏం చూస్తారో అదే కనపడుతుంది. మీ దృష్టి కోణాన్ని మార్చుకోండి. దయచేసి అనవసర విషయాలను ఇందులో కలపకండి అని పోస్టులో ఆయన పేర్కొన్నారు. మరి ఈ విషయం ఇంకెక్కడి వెళ్తుందో చూడాలి.
Home