‘పెద్ది’ సినిమా రిలీజ్ డేట్ గురించి రామ్చరణ్ ఫ్యాన్స్ ఆసక్తికరంగా ఎదురుచూడటానికి రెండు కారణాలు ఉన్నాయి. ఒకటి ఆ సినిమాను చూడాలని, రెండోది చరణ్ కొత్త సినిమాను ఎప్పుడు స్టార్ట్ చేస్తారో తెలుస్తుంది కాబట్టి. సుకుమార్ దర్శకత్వంలో రామ్చరణ్ నెక్స్ట్ సినిమా ఉంటుందని కొన్ని నెలల క్రితమే అధికారికంగా ప్రకటించారు. అయితే సినిమా కథ ఇంకా రెడీ అవ్వలేదని, ప్రస్తుతం లెక్కల మాస్టార్ టీమ్ అదే పనిలో ఉందని గత కొన్ని నెలలుగా వార్తలు వస్తూనే ఉన్నాయి. దీంతో ఈ సినిమా స్టార్ట్ అవ్వడం ఇంకా ఆలస్యమవుతుందని అనుకున్నారంతా.
అయితే, ‘పెద్ది’ సినిమా షూటింగ్కి గుమ్మడికాయ కొట్టేశారు అనే వార్త వచ్చిన రోజే.. నెక్స్ట సుకుమార్ సినిమాకు కొబ్బరికాయ కొడతారు అనే విషయం బయటకు వచ్చింది. అన్నీ అనుకున్నట్లుగా జరిగితే మే నెలలో సుకుమార్ సినిమాకు కొబ్బరికాయ కొట్టేస్తారని టాక్. ఈ మేరకు నిర్మాణ సంస్థలు మైత్రి మూవీ మేకర్స్, సుకుమార్ రైటింగ్స్ పనులు ప్రారంభించాయట. సినిమా కథ పనులు ఇంకొన్ని రోజులు కొనసాగే అవకాశం ఉన్నా.. తొలుత లాంఛనంగా స్టార్ట్ చేసేద్దాం అనే ఆలోచనలో ఉన్నారట.
మామూలుగానే సుకుమార్ కథను ఓ పట్టాన తేల్చరు. నెలలపాటు రాస్తూనే ఉంటారు. సినిమా మొదలైనా ఆయన కథ రాత జరుగుతూనే ఉంటుంది. కాబట్టి ఇప్పుడు మొదలుపెట్టేసి.. చిన్న గ్యాప్ తీసుకొని షూటింగ్ స్టార్ట్ చేద్దామనే ఆలోచనలో ఉన్నారట. మరేం చేస్తారు అనేది చూడాలి. ఇక ఏప్రిల్ 30తో ‘పెద్ది’ షూటింగ్ పూర్తయిందంటూ టీమ్ గుమ్మడికాయ కొట్టేసింది. ఆఖరిగా రామ్చరణ్, శ్రుతి హాసన్పై తెరకెక్కించిన ఐటెమ్ సాంగ్ ఆఖరిది.
ఈ సినిమాను జూన్లో విడుదల చేస్తామని టీమ్ ఇటీవల సోషల్ మీడియా పోస్ట్లో చెప్పగా.. జూన్ 25న వస్తామని దర్శకుడు బుచ్చిబాబు చెప్పారు. అయితే ఇప్పుడు ‘టాక్సిక్’ సినిమా విడుదల కూడా వాయిదా పడటంతో ‘పెద్ది’ని ప్రీపోన్ చేసే అవకాశం ఉన్నట్లు సమాచారం.
