రామ్ చరణ్ కెరీర్ ఆరంభంలో చాలా అణకువతో కనిపించేవాడు. కానీ ‘మగధీర’ ఇండస్ట్రీ ఆల్ టైం హిట్‌గా నిలిచాక అతడిలో మార్పు కనిపించింది. కొన్ని సందర్భంలో ఆడియో వేడుక మీద ‘వెంట్రుక కూడా పీకలేరు’ అంటూ పొగరుగా అన్న మాట మాట్లాడి తీవ్ర విమర్శలెదుర్కొన్నాడు చరణ్. దీనికి తోడు నడి రోడ్డుపై ఒక వ్యక్తిపై దాడి చేసాడు అంటూ వచ్చిన వార్త కూడా అతడి ఇమేజ్‌ను డ్యామేజ్ చేసింది. జనాల్లో వ్యతిరేకత పెంచింది. ఐతే చరణ్ ఇప్పుడు తన తప్పుల నుంచి పాఠాలు నేర్చుకున్నట్లే కనిపిస్తున్నాడు. గత కొంత కాలంగా రామ్ చరణ్ చాల ఒద్దికగా కనిపిస్తున్నాడు. దర్శకుడు, శ్రీవల్లీ లాంటి చిన్న సినిమాల ఆడియో వేడుకలకు వచ్చి మాట్లాడిన మాటలు అందరినీ ఆకట్టుకున్నాయి. ఇతర హీరోల్ని అభినందించే విషయంలో కూడా చరణ్ తన హుందాతనం చూపిస్తున్నాడు.
తాజాగా జై లవ కుశ సినిమా చూసిన రామ్ చరణ్, ఎన్టీఆర్ కు స్వయంగా ఫోన్ చేసి అభినందించారట. రావణుడిగా ఎన్టీఆర్ నటన చాలా బాగుందని చరణ్ కితాబిచ్చారు. అంతేకాదు డిన్నర్ ఆహ్వానించి ఎన్టీఆర్ కు శుభాకాంక్షలు తెలిపాడు. ఈ సందర్భంగా ఎన్టీఆర్‌ను చరణ్ ఆత్మీయంగా హత్తుకుని ఫొటోలకు ఫోజులిచ్చారు. ఎన్టీఆర్, చరణ్ లు కలిసి దిగిన ఫొటోలు ఇప్పుడు సోషల్ మీడియాలో వైరల్ గా మారాయి. ఇటు నందమూరి అభిమానులతో పాటు అటు మెగాభిమానులు కూడా ఈ ఫొటోను షేర్ చేసుకుంటున్నారు. ఎదిగిన కొద్దీ ఒదిగి ఉండటం ఎంత అవసరమో చరణ్‌కు ఇప్పుడు బాగానే అర్థమవుతోంది. ఇంతకుముందు బన్నీ ఇలాగే ఉండి జనాల్ని ఆకట్టుకున్నాడు. ఐతే ఈ మధ్య అతను పవన్ కళ్యాణ్ అభిమానుల విషయంలో.. రివ్యూల విషయంలో చేసిన వ్యాఖ్యలు బన్నీ ఇమేజ్‌ను దెబ్బ తీశాయి.
