‘తిక్క’ మొదలుకొని ‘ఇంటిలిజెంట్’ వరకూ వరుసగా ఐదు ప్లాప్ సినిమాల్లో నటించాడు సాయిధరమ్ తేజ్. క్రియేటివ్ డైరెక్టర్ కృష్ణవంశీ దర్శకత్వంలో నటించిన “నక్షత్రం”, వి.వి.వినాయక్ తెరకెక్కించిన “ఇంటిలిజెంట్, గోపీచంద్ మలినేని రూపొందించిన “విన్నర్”, సునీల్ రెడ్డి “తిక్క”, బీవీఎస్ రవి “జవాన్”.. ఇలా ఈ దర్శకులందరూ తేజ్ కి ఒకర్నిమించి మరొకరు బడా ఫ్లాప్ ని ఇచ్చినవారే. ఈ విధంగా వరుస ఫ్లాపులతో కొట్టుమిట్టాడుతున్నప్పుడు ఏ హీరో అయినా తదుపరి సినిమాల విషయంలో చాలా జాగ్రత్తగా వ్యవహరిస్తుంటాడు కానీ.. తేజ్ మాత్రం కెరీర్ ను ఏమాత్రం లెక్క చేయకుండా కేవలం దర్శకులకు ఇచ్చిన మాట కోసం ఆ సినిమాలు చేశాడట.
కొన్ని సినిమాల రిజల్ట్స్ అయితే ముందే తెలిసినా కూడా కేవలం డైరెక్టర్ కి ఇచ్చిన మాట కోసం షూటింగ్ లో పాల్గొనేవాడట. నిన్న జరిగిన ‘తేజ్ ఐ లవ్ యూ” ప్రీరిలీజ్ ఈవెంట్ లో అల్లు అరవింద్ ఈ విషయాన్ని ప్రస్తావించి.. “ఆ సినిమా పోతుందని తనకు ముందే తెలుసునని, మాటిచ్చాను కాబట్టి చేశానని సాయిధరమ్ తేజ్ చెప్పారని” అల్లు అరవింద్ చెప్పడం చర్చనీయాంశం అయ్యింది. మరి “తేజ్ ఐ లవ్ యూ” పరిస్థితి ఏమిటో ఇంకొక్క రోజు ఆగితే తెలిసిపోతుంది. ఈ సినిమా మీద సాయిధరమ్ తేజ్ తోపాటు హీరోయిన్ అనుపమ పరమేశ్వరన్ & డైరెక్టర్ కరుణాకరణ్ కూడా భారీ ఆశలు పెట్టుకొన్నారు.
